नवी दिल्ली: केंद्र सरकारने महाराष्ट्रातील अन्न व औषध प्रशासन विभाग अधिक सशक्त करण्यासाठी आवश्यक निधी वाढवण्यास मान्यता दिली आहे. केंद्रीय आरोग्य व कुटुंब कल्याण मंत्री जगत प्रकाश नड्डा यांनी या प्रस्तावाला मंजुरी दिल्याची माहिती राज्याचे अन्न व औषध प्रशासन मंत्री नरहरी झिरवाळ यांनी दिली.
यासोबतच, राज्यातील औषध संशोधन, उत्पादन व औद्योगिक विकासाला चालना देण्यासाठी केंद्राने नाशिक, पुणे आणि नागपूर या तीन शहरांत ‘इन्क्युबेशन पार्क’ व ‘फार्मा पार्क’ उभारण्यास प्राथमिक स्तरावर मंजुरी दिली आहे. या प्रकल्पांवर चर्चा करण्यासाठी मंत्री झिरवाळ यांनी दिल्लीमध्ये केंद्रीय आरोग्य मंत्री नड्डा यांची भेट घेतली.
मंत्री झिरवाळ सध्या दोन दिवसांच्या दिल्ली दौऱ्यावर असून, त्यांनी विविध केंद्रीय मंत्र्यांची भेट घेऊन राज्यासाठी महत्त्वाचे प्रकल्प पुढे नेण्याचा प्रयत्न केला. यावेळी त्यांनी अन्न व औषध प्रशासन विभागाच्या सक्षमीकरणासाठी निधी वाढीची मागणी केंद्राकडे मांडली, ज्याला नड्डा यांनी मान्यता दिली.
आदिवासी भागासाठी आरोग्य-शिक्षण प्रकल्प
दिल्ली दौऱ्यात झिरवाळ यांनी केंद्रीय आदिवासी व्यवहार मंत्री जुआल ओराम यांचीही भेट घेतली. आदिवासी समाजाच्या सर्वांगीण विकासासाठी शिक्षण व आरोग्य सुविधांना बळकटी देण्याच्या मुद्द्यावर चर्चा झाली. केंद्र सरकारकडून आदिवासी भागातील नागरिकांच्या जीवनमान उंचावण्यासाठी आवश्यक निधी व सहकार्य देण्याचे आश्वासन मिळाले.
यावेळी झिरवाळ यांनी आदिवासी भागात आयुष मंत्रालयांतर्गत सुमारे 300 आयुर्वेदिक दवाखाने उभारण्याचा मानस असल्याचेही स्पष्ट केले. तसेच आदिवासी समुदायात मौखिक स्वरूपात राहणाऱ्या पारंपरिक आयुर्वेदिक ज्ञानाचे शास्त्रोक्त दस्तऐवजीकरण करण्यासाठी विशेष प्रयत्न करण्याची योजना असल्याचे त्यांनी सांगितले. यामुळे आदिवासी भागातील पारंपरिक वैद्यकीय ज्ञानाचे जतन व संवर्धन होण्यास मदत होईल, असा विश्वास त्यांनी व्यक्त केला.
