मुंबई: सध्या सोशल मीडियावर ‘कॉकरोच जनता पार्टी’ (CJP) नावाच्या एका पक्षाची जोरदार चर्चा सुरू आहे. नीट परीक्षेतील पेपरफुटीच्या निषेधार्थ दिल्लीतील जंतर-मंतरवर या पक्षाने आंदोलन केल्यामुळे हा पक्ष आणखी प्रकाशझोतात आला आहे. आता याच ‘कॉकरोच जनता पार्टी’ची खिल्ली उडवण्यासाठी प्रसिद्ध युट्यूबर आणि ‘बिग बॉस ओटीटी’ विजेता एल्विश यादवने स्वतःचा एक नवीन काल्पनिक राजकीय पक्ष जाहीर केला आहे. या पक्षाचे नाव त्याने ‘खरगोश जनता पार्टी’ असे ठेवले आहे.
एल्विशने सोशल मीडियावर अत्यंत विनोदी शैलीत आपल्या पक्षाचे पोस्टर आणि घोषणापत्र प्रसिद्ध केले आहे. या पोस्टरमध्ये एक ससा गाजर खाताना दिसत आहे आणि त्यावर “सगळे जंतर-मंतरला पोहोचा, सर्वांना मोफत गाजर मिळेल,” अशा विनोदी शैलीत पोस्टर तयार केले आहे. या पोस्टने सोशल मीडियावर नेटकऱ्यांचे लक्ष वेधून घेतले आहे. याआधी एल्विशने ‘कॉकरोच जनता पार्टी’वर टीका करताना, त्यांच्याशी वाद घालण्यापेक्षा पेस्ट कंट्रोल करणे अधिक प्रभावी ठरेल, असा टोला लगावला होता.
जेव्हा एका नेटकऱ्याने नीट पेपरफुटी आणि आर्थिक संकटाबद्दल प्रश्न विचारला, तेव्हा एल्विशने विनोदी उत्तर देताना म्हटले की, “आमच्या पक्षाला पाठिंबा द्या, तुम्हाला हवा तो पेपर आम्हीच लीक करून देऊ”. एल्विशची ही पोस्ट सध्या सोशल मीडियावर प्रचंड व्हायरल होत आहे.
