सोलापूर : सोलापुरात दहावीत शिकणाऱ्या 16 वर्षीय मुलीच्या मृत्यूची दुर्दैवी घटना समोर आली आहे. घरात अभ्यास करण्यावरून आईने मुलीला सुनावल्याचे सांगण्यात येत आहे. त्यानंतर काही वेळातच मुलीने टोकाचे पाऊल उचलले. या घटनेमुळे कुटुंबीयांसह परिसरात हळहळ व्यक्त होत आहे.
अक्षरा मारुती जाधव (वय 16, रा. समाधाननगर, अक्कलकोट रोड) असे मृत मुलीचे नाव आहे. सोमवारी दुपारी साडेतीनच्या सुमारास ही घटना घडल्याची माहिती आहे. घरातील सदस्यांच्या ही बाब लक्षात आल्यानंतर त्यांनी तातडीने अक्षराला उपचारासाठी रुग्णालयात नेले. मात्र, डॉक्टरांनी तपासणीनंतर तिचा मृत्यू झाल्याचे सांगितले.
अक्षरा सध्या दहावीच्या वर्गात शिकत होती. तिचे शिक्षण पूर्ण करून तिने चांगले भविष्य घडवावे, अशी तिच्या आई-वडिलांची इच्छा होती. कुटुंबाची आर्थिक परिस्थितीही बेताची असल्याचे समोर आले आहे. अक्षराचे आई-वडील वीटभट्टीवर मजुरीचे काम करतात.
दहावीचे वर्ष महत्त्वाचे असल्याने आईने तिला अभ्यासाकडे लक्ष देण्यास सांगितले होते. दहावीचं वर्ष आहे तर काय सारखं अभ्यास कर म्हणती असं म्हणत तरुणीने संताप व्यक्त केला आणि त्यावरून ती नाराज झाल्याचे नातेवाईकांनी सांगितले. मात्र, या घटनेमागील नेमके कारण अद्याप स्पष्ट झालेले नाही.
दरम्यान, या प्रकरणाची माहिती मिळताच पोलिसांनी नोंद करून तपास सुरू केला आहे. सध्या मृत्यूमागील नेमके कारण शोधण्याचे काम सुरू असून संबंधित व्यक्तींचे जबाब घेतले जात आहेत.
