लोणी काळभोर, ता. १० : पुणे शहर गुन्हे शाखेच्या युनिट-६ पथकाने मध्यरात्री धाडसी कारवाई करत पेट्रोलपंपावर दरोडा टाकण्याच्या तयारीत असलेल्या सराईत गुन्हेगारांच्या टोळीचा मोठा कट उधळून लावला. मांजरी येथील भापकर मळा रेल्वे पुलाजवळ सापळा रचून पोलिसांनी तिघांना आज बुधवारी (ता. १०) पहाटेच्या सुमारास अटक केली असून त्यांच्या ताब्यातून गावठी पिस्टल, चार जिवंत काडतुसे, तलवार, तीन कोयते, रावण हत्यार, धारदार स्टील पाईप, मिरची पावडर, दोरी आणि कारसह तब्बल ६ लाख ११ हजार रुपयांचा मुद्देमाल जप्त करण्यात आला आहे. या टोळीतील आणखी तीन साथीदार फरार असून त्यांचा शोध सुरू आहे.
अजयसिंग अर्जुनसिंग दुधानी (वय २६, रा. भापकर वस्ती, मांजरी), रामजितसिंग रंजितसिंग टाक (वय २७, रा. तुळजाभवानी वसाहत, हडपसर) आणि अभयसिंग सिकंदरसिंग जुनी (वय २१, रा. सुखकर्ता कॉलनी, फुरसुंगी) अशी अटक करण्यात आलेल्या आरोपीनाची नावे आहेत. रोशन घाडगे (रा. मांजरी खुर्द), शंकरसिंग टाक आणि समीर ऊर्फ कमांडो (दोघे रा. हडपसर) हे तिघेजन फरार झाले आहेत.
पोलिसांनी दिलेल्या माहितीनुसार, पुणे शहरातील अवैध धंदे आणि रेकॉर्डवरील गुन्हेगारांवर कारवाई करण्यासाठी वरिष्ठांच्या आदेशानुसार गुन्हे शाखा युनिट-६ चे प्रभारी पोलीस निरीक्षक सुदर्शन गायकवाड, पोलीस उपनिरीक्षक राहुल कोळपे आणि त्यांचे पथक बुधवारी पहाटे गस्त घालत होते. त्यावेळी गुप्त बातमीदारामार्फत पोलिसांना माहिती मिळाली की, पोलीस अभिलेखावरील आरोपी अजयसिंग अर्जुनसिंग दुधानी हा साथीदारांसह होंडा सीआर-व्ही कारमध्ये भापकर मळा रेल्वे पुलाजवळ थांबला असून ते सर्वजण फुरसुंगी फाटा परिसरातील पेट्रोलपंप आणि महामार्गावरील वाहनांना लक्ष्य करण्याच्या तयारीत आहेत.
या घटनेचीमाहिती मिळताच पोलिसांनी घटनास्थळी धाव घेत सापळा रचला. संशयित कार थांबविण्याचा प्रयत्न केला असता चालकाने वाहनाचा वेग वाढवून पळ काढण्याचा प्रयत्न केला. पोलिसांनी पाठलाग करून रेल्वे पुलाजवळ वाहन आडवे लावत कार अडवली. यावेळी कारमधील काही जण अंधाराचा फायदा घेत पसार झाले; मात्र पोलिसांनी पाठलाग करून तिघांना ताब्यात घेतले. अजयसिंग दुधानी याच्या झडतीत चार जिवंत काडतुसे मिळाली. त्यानंतर कारची तपासणी केली असता डॅशबोर्डमधून एक गावठी पिस्टल सापडले.
वाहनाच्या आतील भागातून तीन धारदार कोयते, एक तलवार, रावण हत्यार, दातेदार स्टील पाईप, मिरची पावडरची पाकिटे आणि दोरी असा दरोड्यासाठी वापरण्यात येणारा साहित्यसाठा जप्त करण्यात आला. तसेच दोन मोबाईल फोन आणि होंडा सीआर-व्ही कारही पोलिसांनी जप्त केली. सर्व मुद्देमालाची किंमत सुमारे ६ लाख ११ हजार रुपये इतकी असल्याचे पोलिसांनी सांगितले.
प्राथमिक चौकशीत आरोपींनी फुरसुंगी फाटा, सोलापूर रोड परिसरातील वाहनचालकांना लुटण्याचा तसेच रात्री सुरू असलेल्या पेट्रोलपंपावर दरोडा टाकण्याचा कट रचल्याची कबुली दिल्याची माहिती पोलिसांकडून देण्यात आली. या गुन्ह्यातील रोशन घाडगे, शंकरसिंग टाक आणि समीर ऊर्फ कमांडो हे तिघे आरोपी अंधाराचा फायदा घेऊन पसार झाले असून त्यांचा शोध घेण्यासाठी विशेष पथके रवाना करण्यात आली आहेत.
पुणे शहरात लागू असलेल्या शस्त्रबंदी आदेशाचे उल्लंघन करून आरोपींनी बेकायदेशीररित्या पिस्टल, काडतुसे व घातक हत्यारे जवळ बाळगल्याचे निष्पन्न झाले आहे. त्यामुळे आरोपींच्या विरोधात मांजरी पोलिस ठाण्यात शस्त्र अधिनियम, १९५९ – 25,3,4 ; महाराष्ट्र पोलीस अधिनियम, १९५१ – 135,37(1),37(2),37(3) ; भारतीय न्याय संहिता (बी एन एस), 2023 – 310(4) प्रमाणे गुन्हा दाखल करण्यात आला आहे.
