मुंबई : सप्टेंबर महिन्याची सुरुवात सर्वसामान्यांसाठी महागाईच्या बातमीने झाली आहे. साखर आणि दूध महागल्यानंतर आता व्यावसायिक एलपीजी सिलिंडरच्या दरातही वाढ करण्यात आली आहे. त्यामुळे हॉटेल, रेस्टॉरंट, खानावळ आणि इतर व्यावसायिकांना स्वयंपाकाच्या गॅससाठी अधिक पैसे मोजावे लागणार आहेत. सणासुदीच्या काळात झालेल्या या दरवाढीचा परिणाम बाहेरचे जेवण आणि खाद्यपदार्थांच्या किमतीवर होण्याची शक्यता आहे.
1 सप्टेंबरपासून 19 किलोग्रॅमच्या कमर्शियल एलपीजी सिलिंडरच्या दरात 9.50 रुपयांची वाढ झाली आहे. राजधानी दिल्लीत या सिलिंडरची किंमत आता 2,747.50 रुपये झाली आहे. चेन्नईमध्ये हाच सिलिंडर 2,916.50 रुपये झाला आहे.
मुंबईत व्यावसायिक एलपीजी सिलिंडरसाठी आता 2,701 रुपये मोजावे लागतील. तर देशातील सर्वाधिक दर लेह येथे असून, तेथे 19 किलोचा सिलिंडर 3,385.50 रुपये इतका आहे.
मात्र घरगुती ग्राहकांना यावेळी काहीसा दिलासा मिळाला आहे. 14.2 किलोच्या घरगुती एलपीजी सिलिंडरच्या किमतीत कोणताही बदल करण्यात आलेला नाही. मुंबईत त्याचा दर 941.50 रुपये, तर दिल्लीत 942 रुपये कायम आहे. 5 किलोच्या व्यावसायिक सिलिंडरच्या दरात मात्र 2 रुपयांची वाढ झाली असून त्याची किंमत 764 रुपये झाली आहे.
दरम्यान, गेल्या काही वर्षांतील 1 सप्टेंबरच्या दरांचा विचार केला तर कमर्शियल सिलिंडरच्या किमतीत अनेकदा चढ-उतार झाले आहेत. 2017 मध्ये 115 रुपयांची मोठी वाढ झाली होती. तर 2023 मध्ये तब्बल 157.50 रुपयांची कपात करण्यात आली होती.
यंदा मात्र 9.50 रुपयांची वाढ झाल्याने हॉटेल आणि खाद्यपदार्थांच्या व्यवसायावरील खर्च वाढण्याची शक्यता आहे. त्याचा अप्रत्यक्ष परिणाम ग्राहकांच्या खिशावरही होऊ शकतो.
