उत्तर प्रदेश : उत्तर प्रदेशमधील इटावामध्ये एक भीषण अपघाताची घटना घडली आहे. चालकाला डोळा लागल्याने भरधाव कार ट्रकला धडकल्याची घटना घडली आहे. ही घटना बुधवारी (दि. २१) सकाळी साडे सहा वाजण्याच्या सुमारास आग्रा-कानपूर महामार्गावरील इटावामध्ये घडली. या अपघातामध्ये एकाच कुटुंबातील चार जणांचा मृत्यू झाला आहे, तर तीन जण गंभीर जखमी झाले आहेत. या घटनेने सर्वत्र हळहळ व्यक्त केली जात आहे.
याबाबत अधिक माहिती अशी कि, उत्तर प्रदेशातील इटावा येथे बुधवारी सकाळी भीषण अपघात झाला. कानपूर- आग्रा महामार्गावर भरधाव वेगात असलेल्या कारने समोरून जाणाऱ्या ट्रकला जोरदार धडक दिली. या अपघातात चार जणांचा जागीच मृत्यू झाला, तर दोन जण गंभीर जखमी झाल्याची प्राथमिक माहिती मिळत आहे. अपघातात मृत आणि जखमी झालेले सर्व एकाच कुटुंबातील असल्याचे बोललेले जात आहे.
चालकाला डोळा लागल्याने घडली घटना
एर्टिगा कार दिल्लीहून हमीरपूरला जात होती. गाडीमध्ये एकाच कुटुंबातील सात जण प्रवास करत होते. यावेळी पिलखार गावाजवळ चालकाला डोळा लागल्याने त्याचे कारवरील नियंत्रण सुटले आणि गाडी समोरुन येणाऱ्या ट्रकला जोरदार धडकली. हा अपघात इतका भयंकर होता की, कार थेट ट्रक तोडून आतमध्ये घुसली.
अपघातात मृत्यू झालेल्यांमध्ये तीन पुरूष आणि एका महिलेचा समावेश असून जखमींमध्ये एक महिला आणि दोन मुलांचा समावेश आहे. चारही मृतदेह रुग्णालयात दाखल करण्यात आले आहेत.
