ठाणे : भिवंडी तालुक्यातील मानकोली परीसरात एक विचित्र घटना घडली आहे. इंडियन ऑईल पेट्रोल पंपच्या बाजूला असलेल्या टायरच्या दुकानांमध्ये हवा भरताना टायरमध्ये अति जास्त प्रमाणात हवा भरल्याने टायर अचानक फुटून हवेत उडाल्याची घटना घडली आहे. या घटनेत एका व्यक्तीच्या तोंडाला जबर मार लागल्याने तो गंभीर जखमी झाला आहे. सुरेंद्र कुमार यादव (वय-45) असं जखमी झालेल्या व्यक्तीचे नाव आहे.
त्याला उपचारासाठी जवळच्या खासगी रुग्णालयामध्ये दाखल करण्यात आले आहे. मात्र, या घटनेचा व्हिडिओ सोशल मीडियावर व्हायरल झाला असून आपण खबरदारी घेतली पाहिजे, हेच लक्षात येईल.
नेमकं काय घडलं?
सुरेंद्र यादव हा पंक्चर बनवण्यासाठी मानकोली येथील समीम पंक्चरवाला याच्याकडे गेला होता. त्यावेळी समीम अली याने पंक्चर बनवून टायरमध्ये हवा भरली होती. मात्र जखमी सुरेंद्र यांनी या टायरमध्ये अजून हवा भरण्यास सांगितले. त्यावेळी समीम अलीने सांगितले की, या टायरमध्ये हवा पुरेशी आहे. तेव्हा पंक्चर बनवण्यासाठी आलेले सुरेंद्र यादव यांनी स्वतः टायरमध्ये हवा भरण्यास सुरुवात केली.
त्यामुळे टायरमध्ये प्रमाणापेक्षा अति जास्त हवा भरली गेल्याने टायर अचानक फुटून हवेत उडाला. या घटनेत सुरेंद्र यादव यांच्या तोंडाला गंभीर जखमा झाल्या आहेत. दरम्यान, तात्काळ त्यांना उपचारासाठी खासगी रुग्णालयात दाखल करण्यात आलं. ही संपूर्ण घटना तेथे बसवण्यात आलेल्या सीसीटीव्ही कॅमेरात कैद झाली आहे. याप्रकरणी नारपोली पोलीस ठाण्यात गुन्हा दाखल करण्यात आला आहे.
