नवी मुंबई : वाशी खाडी पुलावर भल्या पहाटे भीषण अपघात झाला असून या अपघातामध्ये एका दाम्पत्यासह एका तरुणाचा मृत्यू झाला आहे. मुंबईच्या दिशेनं जाताना भरधाव इर्टिगा कारनं डंपरला धडक दिली. ही धडक इतकी भीषण होती की कारचा अक्षरशः चुराडा झाला आहे. अपघातात तिघांचा जागीच मृत्यू झाला आहे. अपघातानंतर काही काळ वाहतूक कोंडी झाली होती. पोलिसांनी घटनास्थळी धाव घेत मृतदेह बाहेर काढून शवविच्छेदनासाठी रुग्णालयात पाठवले. अपघाताचा पंचनामा करून अपघाताची पोलिसात नोंद करण्यात आलीय.
याबाबत अधिक माहिती अशी की, वाशी खाडी पुलावर झालेल्या या अपघात मृत्यू झालेल्यांमध्ये चंद्रकांत कडंगेची आणि त्यांची पत्नी शिला कडंगेची यांच्यासह गणेश उदयसिंग भोसले यांचा मृत्यू झाला आहे. पहाटे झालेल्या अपघातामुळे बराचकाळ वाहतूक कोंडी झाली होती. मुंबईच्या दिशेने येणाऱ्या गाड्यांची मोठी रांग लागली होती.
वाशी खाडी पुलावरून चोवीस तास वाहतूक सुरू असते. या ठिकाणी नवे दोन पूल उभारण्याचंही काम सुरू आहे. यातील मुंबईकडून पुण्याचा दिशेने जाणाऱ्या मार्गीकेचं मुख्यमंत्री एकनाथ शिंदे यांचा हस्ते उद्धाटन करून सुरु करण्यात आला आहे. तर मुंबईकडे येणाऱ्या पुलाचं काम युद्धपातळीवर सुरु असून लवकरच तो पुल देखील सुरु करण्यात येणार आहे.
