मुंबई : बॉलिवूड अभिनेता शाहरुख खानचे वांद्रे येथील प्रसिद्ध ‘मन्नत’ पुन्हा एकदा चर्चेत आले आहे. यावेळी कारण शाहरुख खान किंवा त्याच्या चित्रपटाशी संबंधित नसून, बंगल्याच्या परिसरात आढळलेले दोन साप आहेत. 17 ऑगस्टच्या रात्री मन्नतच्या आवारात दोन साप दिसल्याची माहिती मिळाल्यानंतर सर्पमित्र आणि वन विभागाची टीम घटनास्थळी पोहोचली.
मिळालेल्या माहितीनुसार, रात्री सुमारे 8 वाजता सर्पमित्र विक्की दुबे यांना मन्नत परिसरात दोन साप एकमेकांमध्ये गुंडाळलेल्या अवस्थेत असल्याचा फोन आला. त्यांनी तातडीने वन विभागाच्या संबंधित अधिकाऱ्यांना माहिती दिली. त्यानंतर मार्गदर्शनानुसार सापांचा शोध सुरू करण्यात आला.
शोध घेत असताना बंगल्याच्या आवारातील एका शिडीखाली सुमारे 8 फूट लांबीचा धामण साप आढळून आला. हा साप बिनविषारी असल्याने सुरक्षा कर्मचाऱ्यांसह परिसरातील नागरिकांनीही सुटकेचा नि:श्वास सोडला. सर्पमित्र विक्की दुबे यांनी कोणतीही इजा न करता सापाला सुरक्षितपणे ताब्यात घेतले.
मात्र, दुसरा साप तेथे उपस्थित असलेल्या लोकांची वर्दळ वाढल्यानंतर निसटून गेला. वन विभाग आणि सर्पमित्रांनी रात्री उशिरापर्यंत त्याचा शोध घेतला. मात्र, दुसरा साप सापडला नसल्याची माहिती आहे. रेस्क्यू करण्यात आलेल्या धामण सापाला वन विभागाच्या मार्गदर्शक सूचनांनुसार त्याच्या नैसर्गिक अधिवासात सोडण्यात आले. त्यामुळे मन्नत परिसरातील ही घटना कोणतीही दुर्घटना न घडता संपली.
