मुंबई : मुंबईच्या प्रसिद्ध अशा गोरेगाव फिल्म सिटीमध्ये एक धक्कदायक घटना घडली आहे. फिल्म सिटीत भिंत कोसळून दोन जणांचा मृत्यू झाल्याची घटना घडली. तसेच एक जण जखमी असल्याची माहिती समोर आली आहे. जखमीवर सध्या रुग्णालयात उपचार सुरु असल्याची प्राथमिक माहिती आहे. ही घटना आज संध्याकाळी पावणे सहा वाजण्याच्या सुमारास घडली. मृत्यू झालेले दोघेजण हे मजूर होते. त्यांच्या अंगावर भिंत कोसळल्याने त्यांचा जागीच मृत्यू झाला आहे. संतू मंडल आणि जयदेव मंडल अशी मृत्यू झालेल्या मजुरांची नावे आहेत.
मिळालेल्या अधिक माहितीनुसार, गोरेगाव फिल्म सिटीमधील प्राइम फोकस लिमिटेड येथील इमारतीची अचानक भिंत कोसळली आहे. या घटनेत दोन मजुरांचा मृत्यू झाला आहे. संतू मंडल आणि जयदेव मंडल अशी मृतांची नावे आहेत. तर विक्रम मंडल हे गंभीर जखमी झाले असून त्यांच्यावर रुग्णालयात उपचार सुरु आहेत. घटनेची माहिती मिळताच अग्निशमन दलाचे जवान घटनास्थळी दाखल झाले आहेत. अग्निशमन दलाच्या जवानांकडून घटनास्थळी तपास सुरु आहे.
