नवी मुंबई: नवी मुंबईच्या उलवे परिसरातुन धक्कादायक घटना समोर आली आहे. येथे राहणाऱ्या मावस भाऊ-बहिणीने प्रेम विवाह केला. मात्र, तरुणीने दुसऱ्या मुलासोबत रजिस्टर लग्न केल्याचं तरुणाला समजताच त्याने आत्महत्या केली होती. या प्रकरणात आता पोलिसांच्या चौकशीत या प्रकरणाचा संपूर्ण उलगडा झाला आहे. याप्रकरणी तरुणी विरुद्ध उलवे पोलिस ठाण्यात गुन्हा दाखल करण्यात आला आहे.
अधिक माहिती अशी की, उलवे परिसरात राहणाऱ्या 28 वर्षीय तरुणाने गळफास घेऊन आपलं जीवन संपवल्याची घटना जानेवारी महिन्यात घडली होती. मात्र, त्याच्या आत्महत्येचं नेमकं कारण स्पष्ट झाले नव्हतं. पोलिसांचा तपास सुरू असताना तरुणाने त्याच्याच मावस बहिणीसोबत रजिस्टर पध्दतीने लग्न केल्याचं उघडकीस आलं. या लग्नाबाबत त्यांच्या कुटुंबीयांना माहिती नव्हती. काही दिवसांनंतर तरुणीला या लग्नामुळे आपली समाजात बदनामी होईल अशी भीती वाटू लागली. त्यानंतर दोघांमध्ये वाद होऊ लागले.
यादरम्यान तरुणीने दुसऱ्या मुलासोबत रजिस्टर लग्न केल्याचं तरुणाला समजलं. या घटनेनं मानसिक तणावात जाऊन तरुणाने राहत्या घरात गळफास घेऊन आत्महत्या केली. आत्महत्येनंतर पोलिसांनी मित्राकडे चौकशी केली असता हा प्रकार उघडकीस आला. त्यानंतर पोलिसांनी मुलीविरुद्ध गुन्हा दाखल केला आहे.
