Mumbai News : मुंबई : मुंबई येथील गोरेगाव पूर्व येथील नेस्को संकुलात आयोजित करण्यात आलेल्या लाईव्ह कॉन्सर्टदरम्यान दोन कॉलेज विद्यार्थ्यांचा मृत्यू झाल्याची धक्कादायक घटना समोर आली आहे. या घटनेमुळे कॉलेज वर्तुळात खळबळ उडाली असून पोलिसांनी गुन्हा दाखल करून तपास सुरू केला आहे.
मिळालेल्या माहितीनुसार, 11 एप्रिल रोजी संध्याकाळी सुमारे 6 वाजता नेस्को संकुलातील हॉल क्रमांक 4 मध्ये लाईव्ह म्युझिक कॉन्सर्टचे आयोजन करण्यात आले होते. या कार्यक्रमाला अंदाजे 3000 ते 4000 तरुण-तरुणी उपस्थित होते. कार्यक्रमानंतर अधिकृत आफ्टर पार्टीचे आयोजन करण्यात आले होते आणि ती पहाटेपर्यंत सुरू असल्याची माहिती आहे.
या कार्यक्रमासाठी विविध प्रकारची तिकीट व्यवस्था करण्यात आली होती. जनरल एंट्री तिकीट सुमारे 1499 रुपयांपासून सुरू होते, तर व्हीआयपी तिकीट 2499 रुपयांपर्यंत होते. बॅकस्टेज पास सुमारे 5999 रुपयांना उपलब्ध होते. तसेच स्टेज टेबल आणि व्हीआयपी टेबलसाठी 1 लाख ते 3 लाख रुपयांपर्यंतचे पॅकेज ठेवण्यात आले होते.
कॉन्सर्टदरम्यान काही तरुणांनी मद्यपान आणि अमली पदार्थांचे सेवन केल्याची माहिती समोर आली आहे. ड्रग्जच्या ओव्हरडोसने काही जणांची प्रकृती अचानक बिघडली. यामध्ये एका तरुण आणि एका तरुणीचा मृत्यू झाला असून दोघेही एमबीएचे विद्यार्थी असल्याचे समजते. आणखी एक विद्यार्थी गंभीर जखमी झाला असून त्याच्यावर उपचार सुरू आहेत.
प्रकृती खालावल्याने काही विद्यार्थ्यांना तातडीने जोगेश्वरी येथील ट्रॉमा केअर रुग्णालयात दाखल करण्यात आले. या प्रकरणी वनराई पोलीस ठाण्यात गुन्हा नोंदवण्यात आला असून कॉन्सर्टमध्ये अमली पदार्थ कसे पोहोचले याचा तपास सुरू आहे.
