वाशीम: वाशिम जिल्ह्यातील मालेगाव तालुक्यात पत्नीने प्रियकराच्या मदतीने पतीची हत्या केल्याची धक्कादायक घटना उघडकीस आली आहे. या प्रकरणी पोलिसांनी आरोपी पत्नी आणि तिच्या प्रियकराला अटक केली असून, घटनेमुळे परिसरात खळबळ उडाली आहे.
मृताची ओळख सुरेश झळके अशी असून, ते पत्नी आशा झळके यांच्यासह सासरच्या गावी वास्तव्यास होते. पोलिसांच्या प्राथमिक तपासानुसार, आशा झळके हिचे गावातील महादेव अंभोरे याच्याशी प्रेमसंबंध होते. या संबंधांना सुरेश झळके यांचा विरोध असल्याने ते दोघांच्या मार्गातील अडथळा ठरत असल्याचा संशय आहे.
तपासात समोर आलेल्या माहितीनुसार, 29 जुलै रोजी आशा झळके यांनी पतीला शेतात बोलावले. त्याआधी महादेव अंभोरे हा शेतात दबा धरून बसला होता. सुरेश झळके तेथे पोहोचताच दोघांनी मिळून त्यांचा गळा आवळून खून केल्याचा आरोप आहे. गुन्हा लपविण्याच्या उद्देशाने मृतदेह शेतातील कडुलिंबाच्या झाडाखाली टाकून देण्यात आला.
घटनेची माहिती मिळताच मालेगाव पोलिसांनी घटनास्थळी धाव घेत पंचनामा करून तपास सुरू केला. घटनास्थळावरील पुरावे, चौकशी आणि तांत्रिक तपासाच्या आधारे पोलिसांनी आरोपींपर्यंत पोहोचत या प्रकरणाचा उलगडा केला. तपासादरम्यान पत्नीच्या प्रेमसंबंधांमुळेच हा खून घडल्याचा प्राथमिक निष्कर्ष समोर आला.
यानंतर पोलिसांनी आशा झळके आणि महादेव अंभोरे या दोघांविरुद्ध खुनाचा गुन्हा दाखल करून त्यांना अटक केली आहे. या हत्येमागील इतर कारणे किंवा आणखी कोणी सहभागी होते का, याचाही तपास सुरू असून मालेगाव पोलीस पुढील तपास करत आहेत. :::
