कल्याण : कल्याणमध्ये रात्री उशीरा दोन ठिकाणी चोरीच्या दोन घटना घडल्या आहेत. विषेश म्हणजे या चोऱ्या कोण्या महागड्या शोरूममध्ये झाल्या नसून मेडीकलमध्ये घडल्या आहेत. झालेल्या चोरीमुळे नागरीक घाबरले आहेत. चोरांनी मेडिकलचे शटर उचकटून तेथील रोख रक्कम आणि दुकानातील अनेक वस्तू घेऊन पळ काढला. या घटनेमुळे एकच खळबळ माजली आहे.
कल्याण –डोंबिवली परिसर सध्या गुन्ह्यांच्या घटनांनी हादरला आहे. गेल्या आठवड्यातच उल्हासनगमध्ये भाजप आमदार गणपत गायकवाड यांनी शिवसेना शिंदे गटाच्या शहरप्रमुखावर भर पोलीस ठाण्यात वरिष्ठ अधिकाऱ्यांच्या केबिनमध्ये गोळीबार केला. यामुळे तणावाचं वातावरण असतानाच आता कल्याणमध्ये दोन ठिकाणी झालेल्या चोरीमुळे नागरीक घाबरले आहेत.
कल्याण पश्चिमेकडील खडकपाडा सर्कल येथे भर रस्त्यात असलेल्या मणप्पूरम गोल्ड फायनान्स बँकेसह दोन मेडिकल दुकानाचे शटर उचकटत चोरी करण्यात आली. काल रात्रीच्या सुमारास चोरांनी मणप्पूरम गोल्ड फायनान्स बँकेचं शटर उघडून चोरी करण्याचा प्रयत्न केला. मात्र तिथला अर्लाम वाजल्याने घाबरून चोरांनी तेथून पळ काढला. त्यानंतर तिथल्या दोन मेडिकल दुकानांचे शटर उचकटून तेथील रोख रक्कम आणि दुकानातील अनेक वस्तू घेऊन त्यांनी पळ काढला. या घटनेमुळे एकच खळबळ माजली आहे.
दुकान मालकांनी सीसीटीव्ही फुटेज पोलिसांच्या स्वाधीन करण्यात आले असून पोलीस चोरांचा शोध घेत आहेत.
