मुंबई: मुंबईतील सार्वजनिक वाहतूक व्यवस्था अधिक प्रभावी करण्याच्या दिशेने महत्त्वाचे पाऊल उचलत, मुख्यमंत्री देवेंद्र फडणवीस यांनी मुंबईत ‘पॉड टॅक्सी’ (Pod Taxi) सेवा सुरू करण्याचे निर्देश दिले आहेत. शहरीकरणाच्या वाढत्या वेगामुळे होणाऱ्या वाहतूक समस्यांवर उपाय म्हणून ही सेवा ‘लास्ट माईल कनेक्टिव्हिटी’साठी उपयुक्त ठरणार आहे. सह्याद्री अतिथीगृह येथे झालेल्या एका उच्चस्तरीय बैठकीत या योजनेचा आढावा घेण्यात आला.
पॉड टॅक्सी (Pod Taxi) सेवा देशात प्रथमच मुंबईत सुरू होणार असून, सुरुवातीला कुर्ला ते बांद्रा रेल्वे स्थानकांदरम्यानच्या बिझनेस डिस्ट्रीक्टमध्ये या प्रकल्पाची अंमलबजावणी होणार आहे. या परिसरात प्रस्तावित बुलेट ट्रेन स्टेशन व मुंबई उच्च न्यायालयाच्या विस्तारामुळे भविष्यात नागरिकांची वर्दळ मोठ्या प्रमाणात वाढणार असल्याचे मुख्यमंत्री फडणवीस यांनी नमूद केले.
सिंगल कार्डद्वारे सर्व सेवा
मुंबईत सुरू असलेल्या सिंगल कार्ड प्रणाली अंतर्गत पॉड टॅक्सी सेवाही समाविष्ट करण्यात यावी, अशी सूचना मुख्यमंत्र्यांनी दिली. त्यामुळे प्रवाशांना मेट्रो, बस, रेल्वे व पॉड टॅक्सी अशा सर्व सेवा एका कार्डद्वारे उपलब्ध होतील. यासाठी संबंधित यंत्रणांनी समन्वय साधावा, असेही त्यांनी स्पष्ट केले.
पॉड टॅक्सीच्या पार्श्वभूमीवर कुर्ला आणि बांद्रा स्थानक परिसराचा सर्वंकष विकास करावा, अशी सूचना मुख्यमंत्री फडणवीस यांनी दिली. कुर्ला येथील पोलिस निवासासाठी अन्यत्र जागा उपलब्ध करून देण्याचा प्रस्तावही यावेळी मांडण्यात आला. तसेच, बीकेसीमधील प्रमुख इमारतींना या टॅक्सी सेवा थेट जोडण्यात याव्यात, यावरही भर देण्यात आला.
पॉड टॅक्सी म्हणजे काय? (Pod Taxi)
पॉड टॅक्सी म्हणजेच “Personal Rapid Transit (PRT)” ही एक छोटी, स्वयंचलित (driverless) आणि इलेक्ट्रिक वाहनांवर आधारित सार्वजनिक वाहतूक व्यवस्था आहे. यामध्ये प्रवाशांना एका “pod” नावाच्या छोट्या कॅप्सूलमध्ये एका स्थानकातून दुसऱ्या स्थानकापर्यंत थेट आणि वेगवान प्रवास करता येतो.
