मुंबई : रिलायन्सचे मुकेश अंबानी सतत कोणत्या ना कोणत्या कारणांमुळे चर्चेत असतात. ते आता चर्चेत आले त्यांच्या पत्नी नीता अंबानी यांनी खरेदी केलेल्या सुपर कारमुळे. त्यांनी ही कार एक-दोन नाहीतर तब्बल 12 कोटींना खरेदी केल्याचे सांगण्यात येत आहे. या कारमध्ये अनेक अत्याधुनिक असे फिचर्स देण्यात आले आहेत.
अंबानी यांच्याकडे मेबॅक, फेरारी, बेंटले, मर्सिडीज बेंझ आणि बीएमडब्ल्यू यांसारख्या अनेक आलिशान गाड्या आहेत. पण अंबानी कुटुंबाला रोल्स रॉयस कार सर्वात जास्त प्रमाणात आवडत असल्याचे सांगण्यात येते. आता नीता अंबानी यांनी नवीन रोल्स रॉयस फँटम VIII घेतल्याचे समोर आले आहे. ही आलिशान कार गुलाबी रंगाची असून, खास नीता अंबानी यांच्यासाठी तयार केल्याचे सांगितले जात आहे.
मीडिया रिपोर्ट्सनुसार, भारतात या रोल्स रॉयस कारची किंमत 12 कोटी रुपये आहे. या कारचे फोटो इंटरनेटवर वेगाने व्हायरल होत आहेत. त्या गाडीच्या सीटवर NMA असे लिहिल्याचे दिसत आहे. जे नीता मुकेश अंबानी या नावाशी मिळतेजुळते आहे. सामान्यतः रोल्स रॉयस कारचा रंग काळा आणि पांढरा असतो. मात्र, नीता अंबानी यांच्या कारला ऑर्किड वेल्वेट इंटीरियरसह रोझ क्वार्ट्ज पेंट स्कीमने आकर्षक बनवण्यात आले आहे. सध्या याचीच चर्चा सुरु आहे.
