Badlapur School Crime : बदलापूर येथील एका नामांकित शाळेतील तीन वर्षांच्या दोन चिमुकल्यावर शाळेतल्याच शिपायानं बलात्कार केल्याची धक्कादायक घटना घडली आहे. या घटनेने महाराष्ट्रात संतापाची लाट उसळली आहे. या घटनेच्या निषेधार्थ बदलापूरकर रस्त्यावर उतरले होते. तब्बल १० तास बदलापूरकरांनी मध्य रेल्वेची वाहतूक अडवली होती.
सतत प्रयत्न करुनही सरकारला त्यांची समजूत काढता आली नाही. शेवटी लाठीचार्ज करत आंदोलकांना बाजूला केले. लाठीचार्ज नंतर मुख्यमंत्री एकनाथ शिंदे यांनी प्रतिक्रिया दिली आहे, ते म्हणाले हे आंदोलन राजकीय प्रेरित होतं. याच पार्श्वभूमीवर महाविकास आघाडीने अत्याचारांच्या घटनेच्या निषेधार्थ महाराष्ट्र बंदची हाक दिली आहे.
बदलापूर येथील एका शाळेत दोन चिमुकल्या मुलींवर झालेल्या अत्याचाराच्या घटनेनं नागरिक आक्रमक झाले आहेत. आठवड्याभरानंतर हे प्रकरण उजेडात आल्यानंतर बदलापूरमधील नागरिकांनी सोमवारी मोठ्या प्रमाणात रोष व्यक्त केला. या घटनेच्या निषेशासाठी मोठ्या प्रमाणात नागरिक रस्त्यावर उतरले. तसेच जिथे ही घटना घडली त्या शाळेची तोडफोड केली.
तर दुसरीकडे बदलापूर स्थानकात नागरिक दहा तास ठिय्या मांडून बसले होते. आरोपीला फाशीची शिक्षा देण्याची मागणी नागरिकांनी केली. त्यानंतर पोलिसांनी बळाचा वापर करत आंदोलनकांना त्या ठिकाणाहून बाजूला केले. या घटनेविषयी बोलताना मुख्यमंत्री एकनाथ शिंदे यांनी हे आंदोलन राजकारणाने प्रेरित होतं असं म्हटलं आहे. या घटनेच्या निषेधार्थ आता महाविकास आघाडीने महाराष्ट्र बंदची हाक दिली आहे.
महाराष्ट्रातील परिस्थितीनुसार राज्यातील मुलीसुद्धा सुरक्षित नाहीत. या घटनेला दाबण्यासाठी सरकारने प्रयत्न केले. शाळेची संस्था भाजप आणि आरएसएसची असल्यामुळे त्यांची बदनामी होऊ नये म्हणून काळजी घेतली. महिला पत्रकाराला महायुतीच्या पदाधिकाऱ्याने अपशब्द वापरले. रोज महाराष्ट्राला काळिमा लावण्याचा प्रयत्न केला जात आहे. या पार्शवभूमीवर येत्या २४ तारखेला महाराष्ट्र बंदची हाक आम्ही दिली आहे. त्यामध्ये महाविकास आघाडीचे सर्व नेते कार्यकर्ते सहभागी होणार आहेत, असं नाना पटोले म्हणाले.
