Mumbai Fire News : मुंबई : मुंबईतील ग्रँट रोड येथील एका बहुमजली रहिवासी इमारतीला भीषण आग लागल्याची घटना घडली आहे. ही इमारत २२ मजली असून अकराव्या आणि बाराव्या मजल्यावर आगीची घटना घडली. सध्या अग्नीशमन दलाने आग अटोक्यात आणली आहे. आज सकाळी ९ वाजून ३५ मिनिटांनी ग्रँट रोड येथील ऑगस्ट क्रांती रोड येथील धवलगिरी या इमारतीला भीषण आग लागली. ही आग लेव्हल २ ची असल्याचे सांगण्यात येत आहे. आगीचे धुराचे लोट दूरवरूनही दिसत होते. हवेत धुराचे काळे ढग तयार झाले होते.
दरम्यान, ११.१० मिनिटांनी ही आग अटोक्यात आली. या आगीत कोणत्याही जीवितहानीचे झाल्याचे वृत्त नाही. मात्र ही आग कशी लागली हे कळू शकलेलं नाही. आगीची माहिती मिळताच अग्निशमन दलाच्या गाड्या घटनास्थळी दाखल झाल्या होत्या. गेल्या काही दिवसांपासून मुंबईत आगीच्या घटना वाढल्या आहेत. २१ आणि २२ व्या मजल्यावर काही नागरिक अडकले होते. त्यांना अग्निशमन दलाकडून टेरेसवर सुरक्षितपणे हलवण्यात आले होते. तर, १५ व्या मजल्यावरही ७ ते ८ नागरिक अडकले होते. त्यांनाही पायऱ्यांमार्फत टेरेसवर हलवण्यात आले होते. सध्या घडलेल्या गोष्टींचा तपास सुरू आहे.
