पुणे : पुण्यातील भूगाव परिसरातील तोडकर वस्ती येथे एक सुन्न करणारी घटना उघडकीस आली आहे. पती परशुराम भागप्पा हरिजन (वय 48) याने चारित्र्याच्या संशयावरून आपली पत्नी नीलाबाई हरिजन (वय 42) हिची धारदार शस्त्राने गळा चिरून अत्यंत निर्घृण हत्या केली. या घटनेनंतर आरोपी तात्काळ पसार झाला होता, मात्र बावधन पोलिसांनी शिताफीने तपास करत त्याला अवघ्या 24 तासांच्या आत कर्नाटकातून ताब्यात घेतले.
मिळालेल्या माहितीनुसार, हत्या केल्यानंतर आरोपीने थेट राज्याची सीमा ओलांडून पळ काढला होता. घटनेचे गांभीर्य ओळखून बावधन पोलीस ठाण्यात खुनाचा गुन्हा नोंदवण्यात आला. फरार आरोपीला शोधण्याचे मोठे आव्हान पोलिसांसमोर होते.पोलिसांनी तांत्रिक विश्लेषणाचा वापर करून आरोपीच्या मोबाईल लोकेशनचा माग काढलातपासात आरोपी कर्नाटकातील विजापूर येथील एका निर्जन शेतात लपल्याची माहिती समोर आली.
दरम्यान घटनेची माहिती मिळताच पोलिसांचे विशेष पथक विजापूरला रवाना झाले. स्थानिक पोलीस आणि नागरिकांच्या मदतीने शेताला घेराव घालून मध्यरात्री आरोपीला बेड्या ठोकण्यात आल्या.परशुराम आणि नीलाबाई हे दाम्पत्य भूगाव येथे राहत होते. गेल्या काही दिवसांपासून परशुराम पत्नीच्या चारित्र्यावर सतत संशय घेत होता. याच वादातून संतप्त झालेल्या पतीने धारदार शस्त्राने नीलाबाई यांच्या मानेवर वार केले. गंभीर दुखापत झाल्याने अतिरक्तस्रावामुळे नीलाबाई यांचा जागीच तडफडून मृत्यू झाला.
ही धडक कारवाई पोलीस उपायुक्त प्रदीप जाधव आणि सहाय्यक पोलीस आयुक्त विठ्ठल कुबडे यांच्या मार्गदर्शनाखाली बावधन पोलिसांच्या पथकाने यशस्वीरीत्या पार पाडली.
