Mumbai Crime : मुंबई: मुंबईतील दहिसर पश्चिम परिसरात एका तरुणीवर झालेल्या मारहाणीची धक्कादायक घटना समोर आली आहे. नवागाव येथील शास्त्रीनगर शिवमंदिर परिसरात हा प्रकार घडला असून त्याचा सीसीटीव्ही व्हिडिओ सोशल मीडियावर व्हायरल झाल्यानंतर परिसरात संताप व्यक्त करण्यात आला. या प्रकरणाची दखल घेत पोलिसांनी जलद कारवाई करत अवघ्या 1 तासात आरोपीला अटक केली आहे.
मिळालेल्या माहितीनुसार, ही घटना दहिसर पश्चिम येथील एमएचबी पोलीस ठाण्याच्या हद्दीत घडली. एका तरुणाने सार्वजनिक ठिकाणी तरुणीला अडवून तिच्यावर मारहाण केली. त्याने लाथा-बुक्क्यांनी हल्ला करत तिला गंभीर दुखापत केल्याचे दिसून आले. या संपूर्ण घटनेचा व्हिडिओ परिसरातील सीसीटीव्ही कॅमेऱ्यात कैद झाला होता.
हा व्हिडिओ सोशल मीडियावर मोठ्या प्रमाणात शेअर झाला आणि त्यानंतर नागरिकांनी तीव्र संताप व्यक्त करत आरोपीवर कठोर कारवाईची मागणी केली. या प्रकरणाची गंभीरता लक्षात घेऊन पोलिसांनी तातडीने तपास सुरू केला. सीसीटीव्ही फूटेजच्या आधारे आरोपीची ओळख पटवून त्याचा शोध घेण्यात आला.
पोलिसांनी दिलेल्या माहितीनुसार, राहुल विलास पंडित (वय 28, रा. नवागाव) असे अटक केलेल्या आरोपीचे नाव आहे. प्राथमिक तपासात ही घटना वैयक्तिक वादातून घडल्याचे समोर आले आहे. पोलिसांनी आरोपीविरुद्ध संबंधित कलमांनुसार गुन्हा दाखल केला असून पुढील तपास सुरू आहे.
या घटनेमुळे परिसरात काही काळ तणावाचे वातावरण निर्माण झाले होते. मात्र पोलिसांनी वेळीच कारवाई केल्यामुळे परिस्थिती नियंत्रणात आली. नागरिकांनी अशा प्रकारच्या घटनांविरोधात कठोर भूमिका घेण्याची गरज व्यक्त केली आहे.
