टेंशन विसरा! कमी पगार असलेल्यांनाही मिळणार स्वतःचं घर? पात्रता आणि अर्जाचा गुंता सुटला; पाहा संपूर्ण माहिती

या लॉटरीसाठी पात्र ठरण्यासाठी म्हाडाने उत्पन्नाचे काही ठराविक निकष लावले आहेत. यामध्ये अर्जदाराचे 1 एप्रिल 2025 ते 31 मार्च 2025 या आर्थिक वर्षातील वार्षिक कौटुंबिक उत्पन्न विचारात घेतले जाईल. कौटुंबिक उत्पन्न म्हणजे अर्जदार आणि त्यांच्या पती किंवा पत्नीचे एकत्रित उत्पन्न होय. उत्पन्नाचा पुरावा म्हणून केवळ आयकर विवरणपत्र किंवा तहसीलदारांचा अधिकृत दाखलाच ग्राह्य धरला जाणार आहे. इतर कोणतेही कागदपत्र या प्रक्रियेसाठी चालणार नाही, याची अर्जदारांनी नोंद घेणे आवश्यक आहे.

उत्पन्न गटानुसार मर्यादा पाहायची झाल्यास, अत्यल्प गटासाठी वार्षिक उत्पन्न 6 लाखांपर्यंत असणे गरजेचे आहे. अल्प उत्पन्न गटासाठी ही मर्यादा 9 लाखांपर्यंत, तर मध्यम गटासाठी 12 लाखांपर्यंत निश्चित करण्यात आली आहे. उच्च उत्पन्न गटासाठी मात्र कोणतीही कमाल मर्यादा ठेवण्यात आलेली नाही. जर एखाद्या व्यक्तीचा मासिक पगार 30,000 रुपये असेल, तर त्याचे वार्षिक उत्पन्न साधारण 3.6 लाख रुपये होते. अशा वेळी जर इतर मार्गाने येणारे उत्पन्न मिळून एकूण कौटुंबिक उत्पन्न 6 लाखांच्या आत असेल, तर ती व्यक्ती अत्यल्प गटातून अर्ज करू शकते. विशेष म्हणजे अत्यल्प गटातील व्यक्तीला अल्प गटातही अर्ज करण्याची मुभा देण्यात आली आहे.

 

अर्ज भरताना नागरिकांनी विशेष काळजी घेणे आवश्यक आहे. जर पती आणि पत्नी दोघेही नोकरी करत असतील, तर दोघांचेही उत्पन्न दाखवणे बंधनकारक आहे. कोणत्याही प्रकारची माहिती लपवल्यास किंवा चुकीची माहिती दिल्यास अर्ज रद्द होऊन भरलेली रक्कम जप्त होऊ शकते. इच्छुकांनी म्हाडा मुंबई मंडळाच्या अधिकृत वेबसाईटला भेट देऊन आपला फॉर्म भरावा. अधिक माहितीसाठी वेबसाईटवर उपलब्ध असलेली जाहिरात पुस्तिका काळजीपूर्वक वाचण्याचे आवाहन करण्यात आले आहे.