Mukesh Ambani: मुंबई: प्रसिद्ध उद्योगपती मुकेश अंबानी यांना धमकीचे ईमेल पाठवणाऱ्याला अखेर अटक करण्यात आली आहे. मुंबई पोलिसांनी आरोपीला तेलंगणा राज्यामधून अटक केली आहे. सदर आरोपीने मुकेश अंबानींना तब्बल पाच ईमेल करत धमकी दिली होती. तसेच सुरुवातीला 20, दुसऱ्यांदा 200 आणि त्यानंतर 400 कोटी रुपयांची मागणीही त्याने केली होती. गणेश वानपारधी असं पोलिसांनी अटक करण्यात आलेल्या आरोपीचं नाव आहे. त्याला 8 नोव्हेंबरपर्यंत पोलीस कोठडी सुनावण्यात आली आहे.
गेल्या 27 ऑक्टोबर रोजी मुकेश अंबानींच्या ईमेल अकाऊंटवर एक मेल आला होता. या मेलमध्ये त्यांना धमकी देणाऱ्या व्यक्तीनं मुकेश अंबानी यांच्याकडे 20 कोटी रुपयांची मागणी केली होती. तसेच जर पैसे दिले नाहीत, तर आपला जीव गमवावा लागेल, असं म्हटलं होतं. त्यानंतर मुकेश अंबानी यांच्या सुरक्षा प्रभारीने दिलेल्या तक्रारीच्या आधारे, गावदेवी पोलिसांनी आयपीसीच्या कलम 387 आणि 506 (2) अंतर्गत अज्ञात व्यक्तीविरुद्ध एफआयआर नोंदवून तपास सुरू केला आहे. दरम्यान पहिल्यांदा आरोपीनं 20 कोटी तर दुसऱ्यांदा 200 कोटीची मागणी केली होती. यानंतर आरोपीनं तिसरा ईमेल करत 400 कोटी रुपयांची मागणी आरोपींनी केली होती.
