मुंबई: उपमुख्यमंत्री तथा गृहमंत्री देवेंद्र फडणवीस यांना जीवे मारण्याची धमकी देणाऱ्या मुख्य आरोपीला साताऱ्यामधून अटक करण्यात आली आहे. मुख्य आरोपी किंचक नवले याला पोलिसांनी अटक केली आहे. त्याला न्यायालयात हजर केले असता 7 मार्चपर्यंत पोलीस कोठडी सुनावण्यात आली आहे. उपमुख्यमंत्री देवेंद्र फडणवीसांना सोशल मीडियावरुन जीवे मारण्याची धमकी दिली होती. यानंतर पोलिसांनी ही कारवाई केली आहे.
देवेंद्र फडणवीस यांच्याबद्दल प्रक्षोभक भाषा वापरून त्यांना जीवे ठार मारण्याची धमकी देणारी वक्तव्ये असलेल्या व्हिडीओ समाज माध्यमात व्हायरल करण्यात आला होता. व्हिडीओ व्हायरल झाल्यानंतर पोलिसांकडून मुख्य आरोपी किंचक नवलेचा शोध सुरू होता. नवले हा वेशांतर करून वेगवेगळ्या ठिकाणी राहत असल्याची माहिती तपासात समोर आली आहे. शनिवारी सातारा स्थानिक गुन्हे शाखेच्या मदतीने सांताक्रूझ पोलिसांनी त्याला साताऱ्यातील सदर बाझार येथून अटक केली आहे. हा व्हिडीओ आपल्या ‘एक्स’ हँडलवरून व्हायरल केल्याप्रकरणी योगेश सावंत याला याआधीच अटक करण्यात आली आहे.
या प्रकरणात अटक करण्यात आलेला योगेश हा राष्ट्रवादी काँग्रेस शरदचंद्र पवार पक्षाच्या सोशल मीडिया सेलचा उपाध्यक्ष आहे.
