मुंबई : संपूर्ण जगभरात लोकप्रिय असलेल्या लालबागच्या राजा गणेशोत्सव मंडळाची जय्यत तयारी सुरु झाली आहे. कारण उद्या 7 सप्टेंबरला सर्वांचा लाडक्या गणपती बाप्पाचं आगमन होणार आहे. त्याच धर्तीवर या गणेश उत्सव मंडळाची तयारी सुरू आहे. यादरम्यानच या मंडळामध्ये एका महत्त्वाच्या पदी, रिलायन्सचे सर्वेसर्वा मुकेश अंबानी यांचे सुपुत्र अनंत अंबानी यांचाही प्रवेश झाला आहे.
अवघ्या काही तासांनंतर गणेशोत्सवाला प्रारंभ होणार आहे. याच पार्श्वभूमीवर अनंत अंबानी यांना लागबागचा राजा मंडळाकडून अत्यंत महत्वाची जबाबदारी सोपवण्यात आली आहे. या मंडळाची वार्षिक सर्वसाधारण सभा नुकतीच पार पडली. या सभेत अनंत अंबानी यांना प्रमुख जबाबदारी देण्याच्या प्रस्तावाला एकमताने मंजुरी देणयात आली. यानुसार, अनंत अंबानी यांना मानद सदस्य म्हणून नियुक्त करण्यात आले आहे.
लालबागचा राजा गणेश उत्सव मंडळाप्रती अंबानी कुटुंबाची आत्मियता आणि त्यांचा सेवाभाव यामुशं मंडळाच्या प्रगतीलाही वाव मिळाला असून, त्यामुळंही मंडळात अनंतच्या नावाचा समावेश करण्यात आल्याचं सांगण्यात येत आहे.
