मुंबई : मतदार यादीत नाव नसल्यास किंवा नाव, पत्ता यांसारख्या नोंदींमध्ये काही चूक असल्यास ती दुरुस्त करून घेण्यासाठी नागरिकांना आणखी वेळ मिळणार आहे. केंद्रीय निवडणूक आयोगाने महाराष्ट्रासह सहा राज्यांमध्ये सुरू असलेल्या मतदार यादीच्या विशेष सखोल पुनरीक्षण (SIR) कार्यक्रमाच्या वेळापत्रकात बदल केला आहे. त्यामुळे नवीन मतदारांना नाव नोंदवण्याची, तसेच विद्यमान मतदारांना आपल्या नोंदींमध्ये दुरुस्ती करण्याची संधी मिळाली आहे.
निवडणूक आयोगाने २९ ऑक्टोबर २०२६ रोजी जारी केलेल्या आदेशानुसार, महाराष्ट्र, दिल्ली, हरियाणा, आंध्र प्रदेश, तेलंगणा आणि नागालँड या राज्यांमधील दावे आणि हरकती दाखल करण्याच्या प्रक्रियेसाठी सुधारित वेळापत्रक निश्चित करण्यात आले आहे. मात्र, प्रत्येक राज्यासाठी अंतिम मुदत वेगवेगळी असल्याने नागरिकांनी आपल्या राज्याचे वेळापत्रक तपासणे आवश्यक आहे.
महाराष्ट्रातील मतदारांसाठी दावे आणि हरकती दाखल करण्याची मुदत वाढवून १३ नोव्हेंबर २०२६ करण्यात आली आहे. त्यानंतर २५ नोव्हेंबरपर्यंत प्राप्त दावे आणि हरकतींचा निपटारा केला जाणार आहे. तर राज्याची अंतिम मतदार यादी ३० नोव्हेंबर २०२६ रोजी प्रसिद्ध होणार आहे.
त्यामुळे मतदार यादीत नाव समाविष्ट करायचे असल्यास किंवा आधीपासून असलेल्या नोंदींमधील चुका दुरुस्त करायच्या असल्यास नागरिकांना १३ नोव्हेंबरपर्यंत प्रक्रिया पूर्ण करता येणार आहे.
दिल्लीतील मतदारांसाठी दावे आणि हरकती दाखल करण्याची अंतिम तारीख ३० ऑक्टोबरवरून वाढवून २५ नोव्हेंबर २०२६ करण्यात आली आहे. या कालावधीत प्राप्त झालेल्या दावे आणि हरकतींची छाननी करून १५ डिसेंबरपर्यंत निपटारा केला जाणार आहे. त्यानंतर २२ डिसेंबर २०२६ रोजी दिल्लीची अंतिम मतदार यादी प्रसिद्ध होईल.
हरियाणा आणि आंध्र प्रदेश या दोन्ही राज्यांमध्ये दावे आणि हरकतींचा निपटारा करण्यासाठी २० नोव्हेंबर २०२६ ही अंतिम तारीख निश्चित करण्यात आली आहे. या दोन्ही राज्यांच्या अंतिम मतदार याद्या ३० नोव्हेंबर रोजी प्रसिद्ध केल्या जाणार आहेत. या राज्यांसाठी पात्रता तारीख १ जुलै २०२६ निश्चित करण्यात आली आहे.
संबंधित राज्यांच्या मुख्य निवडणूक अधिकाऱ्यांनी केलेल्या शिफारशी आणि मतदारांची सोय लक्षात घेऊन निवडणूक आयोगाने वेळापत्रकात बदल केला आहे. पात्र नागरिकांना मतदार यादीत नाव नोंदवण्यासाठी किंवा आधीच्या नोंदींमध्ये आवश्यक सुधारणा करण्यासाठी पुरेसा वेळ मिळावा, हा या निर्णयामागील उद्देश असल्याचे सांगण्यात आले आहे.
मतदारांनी आपल्या राज्यासाठी लागू असलेली अंतिम तारीख तपासून घ्यावी. मतदार यादीत नाव नसल्यास नाव नोंदणीसाठी, तर नाव किंवा इतर तपशिलांमध्ये चूक असल्यास दुरुस्तीसाठी आवश्यक अर्ज आणि कागदपत्रे निर्धारित मुदतीत सादर करावीत. अंतिम मतदार यादी प्रसिद्ध होण्यापूर्वी आपले नाव आणि नोंदी योग्य असल्याची खात्री करून घेणे महत्त्वाचे आहे.
