नवी मुंबई : ऐरोली येथील सुशिलाबाई देशमुख विद्यालयामध्ये दहावीत शिकणाऱ्या एका विद्यार्थिनीने आत्महत्या केल्याची धक्कादायक घटना समोर आली आहे. परीक्षेदरम्यान कॉपी प्रकरणावरून शाळेतील मुख्याध्यापिका देशमुख मॅडम यांनी सार्वजनिकरित्या अपमानित केल्यामुळे विद्यार्थीनेने हे पाऊल उचलल्याचे सांगितले जात आहे.
आत्महत्या केलेल्या विद्यार्थीने नाव अनुष्का शहाजी केवळे असं असून, या प्रकरणी रबाळे पोलीस ठाण्यात मुख्याध्यापिका विरोधात गुन्हा दाखल करण्यात आला आहे.
या प्रकरणी मुलीच्या पालकांनी दिलेल्या तक्रारीत म्हंटले आहे की, ‘काही दिवसांपूर्वी शाळेत परीक्षा सुरू असताना अनुष्काच्या बेंचखाली कॉपीची एक चिठ्ठी सापडली होती. या कारणामुळे मुख्याध्यापिका देशमुख यांनी अनुष्काला सर्व विद्यार्थ्यांसमोर अपशब्द वापरून तिचा अपमान केला. या अपमानामुळे अनुष्का मानसिक तणावात गेली आणि घरी परतल्यानंतर तिने आत्महत्या केली. असा आरोप पालकांनी केला आहे.
या घटनेची दखल घेऊन रबाळे पोलिसांनी मुख्याध्यापिका विरोधात आत्महत्येस प्रवृत्त केल्याप्रकरणी गुन्हा दाखल केला आहे. पोलीस या प्रकरणाचा पुढील तपास करत असून, या घटनेमुळे विद्यार्थी आणि पालकांमध्ये संतापाचे वातावरण आहे.
