मुंबई: डोंबिवली पश्चिममध्ये भावी वधूची (Mumbai Crime) तब्बल 92 लाख 75 हजार रुपयांची फसवणूक केल्याची धक्कादायक घटना उघडकीस आली आहे. इन्स्टाग्रामवर ओळख करून प्रेमसंबंध ठेवत आरोपीने पीडितेला लग्नाचं आश्वासन दिले होते. त्यानंतर आपल्या घरावर ईडीची धाड पडल्याचं सांगत सोन्याचे दागिने आणि मोठी रक्कम उकळल्याचं विष्णुनगर पोलिसांनी सांगितलं. या प्रकरणी पोलिसांनी तांत्रिक तपास करत शैलेश प्रकाश रामगुडे या 30 वर्षीय रीलस्टारला अटक केली आहे. त्याचे इन्स्टाग्रामवर एक मिलियन फॉलोअर्स असल्याची माहिती समोर आली असून त्याने आतापर्यंत अनेक तरुणींची अशाच पद्धतीने फसवणूक केल्याचे उघड झाले आहे. फसवणुकीतून मिळालेले सोनं त्याने ठाण्यातील सोनारांना विकले होते, ते पोलिसांनी जप्त केले आहे. (Latest Breaking News)
पोलिसांच्या माहितीनुसार पीडित तरुणी ही डोंबिवली पश्चिमेतील हायप्रोफाईल सोसायटीत राहते, तर आरोपी शैलेश हा ठाणे पश्चिमेतील हिरानंदानी इस्टेटमध्ये राहतो. 2024 मध्ये दोघांची इन्स्टाग्रामवर ओळख झाली आणि मैत्रीचे रूपांतर प्रेमात झाले. सप्टेंबर 2024 मध्ये आरोपीने आपल्या घरावर ईडीची धाड पडल्याचे सांगत दोन किलो सोनं आणि एक कोटी रुपये जप्त झाल्याचा दावा केला. ते सोडवण्यासाठी त्याने पीडितेकडून सोन्याचे दागिने आणि रोख रक्कम असा एकूण 92 लाख 75 हजार रुपयांचा ऐवज घेतला.
सप्टेंबर 2024 ते ऑगस्ट 2025 या काळात हा प्रकार सुरू राहिला. त्यानंतर आरोपी लग्नाच्या चर्चेतून मागे हटला आणि पैसेही परत दिले नाहीत. त्यामुळे पीडितेने 5 नोव्हेंबर रोजी पोलिसांकडे तक्रार दाखल केली. तांत्रिक तपासात आरोपी तरुणींना बीएमडब्ल्यू कार आणि ऐशोआरामी जीवन दाखवत आपल्या जाळ्यात ओढत असल्याचे उघड झाले. मॉडेलिंग क्षेत्रात काम करतो असा खोटा आव आणून तो तरुणींवर विश्वास बसवत असे आणि संधी साधून त्यांच्याकडून पैसे व दागिने घ्यायचा. उद्देश साध्य झाल्यावर तो संपर्क तोडत असे.
पोलिसांनी शैलेशकडून 39 तोळे सोनं, एक बीएमडब्ल्यू कार आणि चार महागडे मोबाईल फोन असा मुद्देमाल जप्त केला आहे. त्याने यापूर्वीही एका पीडितेकडून 43 लाख आणि दुसऱ्या प्रकरणात 29 लाखांची फसवणूक केल्याचे तपासात समोर आले आहे. हे सर्व प्रकार लक्षात घेता विष्णुनगर पोलीस ठाण्याने तातडीने कारवाई करत आरोपीला अटक केली असून पुढील तपास सुरू आहे.
