मुंबई: नवी मुंबईतील ऐरोली परिसरात महिलांच्या गळ्यातील सोन्याचे दागिने हिसकावून जबरी चोरी करणाऱ्या संघटित टोळीविरोधात रबाळे पोलिसांनी महाराष्ट्र संघटित गुन्हेगारी नियंत्रण अधिनियम (मोका) अंतर्गत कठोर कारवाई केली आहे. 24 मार्च 2026 रोजी ऐरोली, तळवली आणि ऐरोली गाव परिसरात तीन महिलांच्या गळ्यातील सोन्याचे दागिने चाकूचा धाक दाखवत हिसकावण्यात आले होते.
रबाळे पोलिसांच्या गुन्हे प्रकटीकरण पथकाने तांत्रिक विश्लेषण, सीसीटीव्ही फुटेज आणि गोपनीय माहितीच्या आधारे हे तिन्ही गुन्हे उघडकीस आणले. या कारवाईत चोरीस गेलेला 1,05,000 रुपये किमतीचा मुद्देमाल जप्त करण्यात आला आहे.
या प्रकरणात आयुष देटके, अर्जुन चव्हाण, अपर्णा आवळे आणि तखतसिंग राठोड यांना अटक करण्यात आली आहे. तर अविनाश शिशुपाल, अनिकेत शिशुपाल आणि मोहम्मद शाहबाज खान यांचा शोध सुरू आहे.
तपासादरम्यान आरोपी अविनाश शिशुपाल आणि त्याच्या साथीदारांविरोधात नवी मुंबई व मुंबई परिसरात 14 गंभीर गुन्हे दाखल असल्याचे समोर आले. विविध गुन्ह्यांमधून त्यांनी 18,83,400 रुपये किमतीचा मुद्देमाल लंपास केला असून त्यापैकी 9,43,750 रुपये किमतीची मालमत्ता जप्त करण्यात आली आहे.
आरोपींची संघटित गुन्हेगारी पार्श्वभूमी लक्षात घेऊन वरिष्ठ अधिकाऱ्यांच्या मंजुरीनंतर या टोळीवर मोका अंतर्गत कारवाई करण्यात आली असून पुढील तपास रबाळे विभागाचे सहाय्यक पोलीस आयुक्त राहुलकुमार धस करत आहेत.
