मुंबई: उपमुख्यमंत्री एकनाथ शिंदे यांच्याशी संबंधित कथित 500 कोटी रुपयांच्या प्रकरणावरून राज्यातील राजकीय वातावरण तापले आहे. मराठा आरक्षण आंदोलनाचे नेते मनोज जरांगे यांनी ऑडिओ क्लिप प्रसिद्ध करत गंभीर आरोप केले असताना, मंत्री चंद्रशेखर बावनकुळे यांनी जरांगे यांना अधिकृत तक्रार दाखल करण्याचे आवाहन केले आहे. या प्रकरणात ठोस पुरावे सादर केल्यास सखोल आणि निष्पक्ष चौकशी केली जाईल, असे आश्वासनही त्यांनी दिले.
नागपूर पदवीधर मतदारसंघाच्या दौऱ्यादरम्यान पत्रकारांशी बोलताना बावनकुळे यांनी ही भूमिका मांडली. जरांगे यांच्याकडे कथित 500 कोटी रुपयांच्या आर्थिक व्यवहारासंदर्भात ठोस पुरावे असतील, तर त्यांनी केवळ प्रसारमाध्यमांसमोर आरोप करण्याऐवजी पोलीस किंवा जिल्हाधिकाऱ्यांकडे अधिकृत तक्रार दाखल करावी, असे ते म्हणाले.
जरांगे यांनी गुरुवारी जालना येथे एक ऑडिओ क्लिप प्रसिद्ध केली. या क्लिपच्या आधारे त्यांनी आपले आंदोलन दडपण्यासाठी आणि आपल्याला गप्प करण्यासाठी शिवसेनेचे खासदार श्रीकांत शिंदे यांच्या माध्यमातून कथित 500 कोटी रुपयांचा व्यवहार करण्याचा कट रचल्याचा आरोप केला. या आरोपांमुळे राजकीय वर्तुळात चर्चेला उधाण आले आहे. या प्रकरणी अधिकृत तक्रार प्राप्त झाल्यानंतर मुख्यमंत्री आणि गृह विभाग संबंधित यंत्रणांच्या माध्यमातून निष्पक्ष व सखोल चौकशी करतील, असे बावनकुळे यांनी स्पष्ट केले. तक्रारीतील तथ्यांची पडताळणी करून नियमानुसार योग्य ती कारवाई करण्यात येईल, असेही त्यांनी सांगितले.
दरम्यान, उपमुख्यमंत्री एकनाथ शिंदे यांनी बुधवारी जाहीर सभेत अशा कोणत्याही आर्थिक व्यवहाराचे आरोप फेटाळले होते. आपण कोणालाही पैसे दिले नाहीत किंवा कोणाकडून पैसे घेतले नाहीत, अशी भूमिका त्यांनी मांडली होती. जरांगे हे आपल्या सुरक्षेबाबत भीती व्यक्त करणारी विधाने करून जनतेची सहानुभूती मिळवण्याचा प्रयत्न करत असल्याचा आरोपही बावनकुळे यांनी केला. त्यामुळे आता जरांगे या प्रकरणी अधिकृत तक्रार दाखल करतात का आणि त्यानंतर चौकशीला कोणती दिशा मिळते, याकडे राजकीय वर्तुळाचे लक्ष लागले आहे.
