मुंबई : मुंबईमध्ये भीषण अपघात झाल्याची धक्कादायक घटना समोर आली आहे. मुंबईच्या सांताक्रुझ परिसरामध्ये आज सकाळी भरधाव डंपरने चार वाहनांना जोरदार धडक दिल्याची घटना घडली आहे. या अपघातामध्ये वाहनांचा चक्काचूर झाला असून, चार जण गंभीर जखमी झाले आहेत. जखमींना तात्काळ जवळच्या रुग्णालयात दाखल करण्यात आले आहे.
पोलिसांनी दिलेल्या माहितीनुसार, मुंबई येथील सांताक्रुझ परिसरामध्ये आज सकाळी भीषण अपघात झाला आहे. या अपघातामध्ये वाहनांचा चक्काचूर झाला असून, चार जण गंभीर जखमी झाले आहेत. कलिना युनिव्हर्सिटीसमोरील उड्डाण पुलावरून वेगाने खाली जाणाऱ्या डंपरने चार वाहनांना जोरदार धडक दिली. या अपघातामध्ये दोन कार आणि दोन रिक्षा या वाहनांचा समावेश आहे.
दरम्यान, या अपघाताची माहिती मिळताच बीकेसी पोलिसांनी घटनास्थळी धाव घेतली आहे. जखमींपैकी दोन जणांना व्ही.एन. देसाई रुग्णालयात दाखल करण्यात आले आहे. तर एका व्यक्तीला लीलावती रुग्णालय दाखल करण्यात आले आहे. तर चौथ्या जखमी व्यक्तीला सायन रुग्णालयात उपचारासाठी दाखल केले आहे. या प्रकरणी बीकेसी पोलिसांनी गुन्हा दाखल केला आहे. पुढील तपास बीकेसी पोलिस करीत आहेत.
