मुंबई : राज्यातील पीक कर्ज वसुलीसाठी महसूल विभागाकडून स्थगिती देण्यात आली आहे. त्यामुळे दुष्काळग्रस्त भागातील शेतकऱ्यांना हा मोठा दिलासा मिळाल्याचे समजले जात आहे. 40 तालुक्यांमध्ये तसेच इतर तालुक्यांमधील 1021 महसुली मंडळांमध्ये दुष्काळ जाहीर करण्यात आला होता. त्यातच आता दुष्काळसदृश्य परिस्थिती घोषित केलेल्या भागातील कर्ज वसुलीसाठी महसूल विभागाकडून स्थगिती देण्यात आली आहे. त्याशिवाय सवलतीही जाहीर करण्यात आल्यात.
काय असणार सवलती?
जमीन महसूलात सूट
सहकारी कर्जाचे पुनर्गठन
शेतीशी निगडीत कर्जाच्या वसूलीस स्थगिती
कृषी पंपाच्या चालू विजबिलात 33.5 टक्के सूट
शालेय / महाविद्यालयीन विद्यार्थ्याच्या परिक्षा शुल्कात माफी
रोहयो अंतर्गत कामाच्या निकषात काही प्रमाणात शिथिलता
आवश्यक तेथे पिण्याचे पाणी पुरविण्यासाठी टँकर्सचा वापर
पाणी पुरविण्यासाठी टंचाई जाहीर गावात शेतीच्या पंपाची वीज जोडणी खंडीत न करणे
राज्यातील 15 जिल्ह्यातील 24 तालुक्यामध्ये गंभीर तर 16 तालुक्यांमध्ये मध्यम दुष्काळ जाहीर झाला. राज्यातील तालुक्यांमध्ये जून ते सप्टेंबर या कालावधीतील पर्जन्याची तूट, उपलब्ध असलेल्या भूजलाची कमतरता, दूरसंवेदन विषयक निकष, वनस्पती निर्देशांक, मृदू आर्द्रता, असे निकष लावत दुष्काळ जाहीर करण्यात आला. तसेच, पेरणीखालील क्षेत्र व पीकांची स्थिती या सर्व घटकांचा एकत्रित विचार करून या घटकांनी प्रभावित झालेल्या तालुक्यामध्ये आपत्तीची शक्यता विचारात घेवून सरकारने दुष्काळ जाहीर केला. जालना, छत्रपती संभाजीनगर, पुणे, नाशिक, बीड, लातूर, धाराशिव आणि सोलापूर जिल्ह्यातील जवळपास सर्वच तालुक्यात दुष्काळ जाहीर करण्यात आला.
