Online Shopping Fraud : नवी मुंबई: सायबर क्राईमच्या घटनांमध्ये दिवसेंदिवस वाढ झालेली दिसत आहे. क्रेडिट कार्ड, ऑनलाइन शॉपिंग याद्वारे ग्राहकांची मोठ्या प्रमाणावर फसवणूक केली जाते आहे. नवी मुंबईतल्या ३१ वर्षीय एका महिला डॉक्टरची अशाच पद्धतीने फसवणूक करण्यात आली. या महिला डॉक्टरला ३०० रुपयांची लिपस्टिक घेताना १ लाख गमवावे लागले आहेत. या महिला डॉक्टरला एका ई कॉमर्स साईटवरुन लिपस्टिक ऑनलाईन ऑर्डर करणं चांगलंच महागात पडलं आहे.
मिळालेल्या माहितीनुसार, ३१ वर्षीय महिला डॉक्टरने एक लिपस्टिक ऑर्डर केली. काही दिवसांनी महिलेला ऑर्डर डिलिव्हरी झाल्याचा मेसेज आला. मात्र ऑर्डर केलेली वस्तू मिळालीच नाही म्हणून तिने कंपनीच्या हेल्पलाईन क्रमांकावर फोन केला. त्या क्रमांकावर महिलेला सांगण्यात आले की, तुम्हाला २ रुपये पाठवावे लागतील. परंतु, महिलेने पैसे पाठवण्यास नकार दिला. त्यानंतर या डॉक्टरला एक वेब लिंक पाठवली. तिला ही लिंक डाउनलोड करण्यास सांगितलं. यानंतर डॉक्टरचा पत्ता आणि बँक तपशीलही भरण्यास सांगितलं. त्यानंतर त्यांना BHIM UPI लिंक करण्याचा संदेशही आला. आता तु्म्हाला ऑर्डर पोहचेल असं आश्वासन देखील देण्यात आलं.
यानंतर ९ नोव्हेंबरला महिला डॉक्टरच्या खात्यातून ९५ हजार आणि नंतर ५ हजार रुपये असे एक लाख रुपये डेबिट झाले. या प्रकरणी महिला डॉक्टरने पोलिसात तक्रार केली. पोलिसांनी गुन्हा दाखल करुन तपास सुरु केला आहे. ऑनलाइन शॉपिंग करत असताना अशा पद्धतीने गंडा घालून महिला डॉक्टरची फसवणूक केल्याचा प्रकार नवी मुंबईत घडला आहे.
