Crime News: ठाणे : ठाणे जिल्ह्यातील मिरा-भाईंदर शहरात कायदा आणि सुव्यवस्थेबाबत चिंता वाढवणारी एक गंभीर घटना समोर आली आहे. काशिमीरा पोलीस ठाण्यापासून अवघ्या 100 मीटर अंतरावर असलेल्या एका नामांकित हॉटेलमध्ये अश्लील चित्रफितींचे चित्रीकरण सुरू असल्याचा प्रकार उघड झाला आहे. सामाजिक कार्यकर्ते डॉ. बिनू वर्गीस यांनी मिळालेल्या माहितीच्या आधारे पोलिसांना सतर्क केले, त्यानंतर पोलिसांनी तात्काळ कारवाई करत संबंधित हॉटेलवर छापा टाकला.
काशिमीरा नाका परिसरातील हॉटेल सोना येथे गेल्या काही दिवसांपासून संशयास्पद हालचाली सुरू असल्याची माहिती पोलिसांना मिळाली होती. या ठिकाणी बाहेरून येणाऱ्या काही व्यक्तींची ये-जा वाढली होती. माहितीच्या आधारे पोलिसांनी छापेमारी केली असता हॉटेलमधील दोन खोल्यांमध्ये चित्रीकरण सुरू असल्याचे आढळून आले. या खोल्यांची तपासणी करताना चित्रीकरणासाठी वापरण्यात येणारे काही साहित्य आणि तांत्रिक साधने पोलिसांनी ताब्यात घेतली.
पोलिसांनी हॉटेलमधील नोंदवही, पाहुण्यांच्या नोंदी आणि इतर कागदपत्रे जप्त केली आहेत. प्राथमिक तपासात या ठिकाणी नियोजनबद्ध पद्धतीने चित्रीकरण केल्याचे संकेत मिळाले आहेत. तसेच या प्रकरणात काही बाहेरील व्यक्तींसह हॉटेलमधील काही कर्मचाऱ्यांचा सहभाग असण्याची शक्यता पोलिसांनी व्यक्त केली आहे.
या संपूर्ण प्रकरणाची माहिती वरिष्ठ अधिकाऱ्यांना देण्यात आली असून, गोळा केलेले सर्व पुरावे झोनल डीसीपी यांच्याकडे सुपूर्द करण्यात आले आहेत. सध्या या रॅकेटचा विस्तार, त्यामागील सूत्रधार आणि आर्थिक व्यवहार यांचा तपास सुरू आहे. चौकशी पूर्ण झाल्यानंतर संबंधितांविरुद्ध कायदेशीर कारवाई केली जाणार असल्याचे पोलिसांनी सांगितले.
काही वर्षांपूर्वीही मिरा रोड परिसरात अशाच स्वरूपाचा प्रकार उघडकीस आला होता. त्यामुळे पुन्हा एकदा पोलीस ठाण्याच्या जवळच असा प्रकार समोर आल्याने नागरिकांमध्ये संताप व्यक्त केला जात असून, अशा गैरप्रकारांवर कठोर कारवाई करण्याची मागणी होत आहे.
