मुंबई : डबल महाराष्ट्र केसरी पै. चंद्रहार पाटील यांनी आज शिवसेना उद्धव बाळासाहेब ठाकरे पक्षात प्रवेश केला आहे. पक्षातून मोठे नेते पळून जात आहेत, पण अनेकजण पक्षात येत देखील आहेत, असं म्हणत शिवसेना पक्षप्रमुख उद्धव ठाकरे यांनी चंद्रहार पाटील यांचे पक्षात स्वागत केले. आगामी लोकसभा निवडणुकीची आचारसंहिता कधीही लागू शकते. त्यानुसार सध्या अनेक राजकीय घडामोडी घडत आहेत. अनेक नेत्यांचे पक्षप्रवेश सुरु आहेत.
शिवसेना उद्धव बाळासाहेब ठाकरे पक्षानेही लोकसभेसाठी चांगलीच कंबर कसली आहे. चंद्रहार पाटील यांच्या ठाकरे गटात प्रवेशानंतर उद्धव ठाकरे गटाला सांगलीत लोकसभेसाठी उमेदवार मिळाला आहे. उद्धव ठाकरे, खासदार संजय राऊत यांच्यासह पदाधिकारी आणि कार्यकर्त्यांच्या उपस्थितीत मातोश्रीवर सोमवारी पक्षप्रवेश पार पडला. यावेळी चंद्रहार पाटील यांच्याकडून मोठे शक्ती प्रदर्शन करण्यात आले.
