वसई : बुलढाण्यात राहणाऱ्या एका विवाहितेवर नायगाव-चंद्रपाडा येथे सामूहिक बलात्कार करण्यात आल्याची घटना घडली. हा प्रकार ४ डिसेंबर ते ६ फेब्रुवारीदरम्यानचा आहे. पीडितेने दिलेल्या तक्रारीनुसार १८ फेब्रुवारीला दोघांना अटक करण्यात आली, तर दोघे फरार झाले आहेत.
नोकरीच्या मुलाखतीसाठी २८ वर्षीय विवाहिता बुलढाण्याहून पुण्याला गेली होती. मात्र मुलाखतीची वेळ चुकल्यामुळे तिने पतीचा मित्र पवन सब्बद याच्याशी संपर्क केला. त्याने पुण्याला जाऊन तिला नोकरीचे आमिष दाखवून वसई-नायगाव येथील चंडिका माता मंदिर परिसरातील घरी आणले. तिथे सब्बद आणि त्याचे साथीदार धनराज चव्हाण, नागेश गायकवाड, अभिषेक पुजारी यांनी तिच्यावर सामूहिक बलात्कार केला.
पवन सब्बाद याने तिची अश्लील छायाचित्रे काढून एका बनावट इन्स्टाग्राम खात्यावरून प्रसारितही केली. आरोपींनी तिचा मोबाईल, कर्णफुलेही बळजबरीने काढून घेतली. त्यानंतर पीडितेने बुलढाणा गाठून अकोला जिल्ह्यातील डबकीरोड पोलीस ठाण्यात तक्रार दाखल केली. बलात्काराचा प्रकार नायगावात घडल्यामुळे हा गुन्हा नायगाव पोलीस ठाण्याकडे वर्ग करण्यात आला. त्यामुळे याप्रकरणी नायगाव पोलिसांनी आरोपींविरोधात गुन्हे दाखल केले आहेत.
