Mumbai Pollution मुंबई: मुंबई आणि आसपासच्या परिसरात फटाके फोडण्याच्या वेळेवरील निर्बंध मुंबई उच्च न्यायालयाने वाढवले आहेत. आता केवळ रात्री 8 ते 10 या वेळेतच फटाके फोडण्याची परवानगी असेल. या अगोदर सायंकाळी 7 ते रात्री 10 अशी परवानगी होती. मुंबई महानगर क्षेत्रातील प्रदूषणाच्या प्रश्नावर मुंबई उच्च न्यायालयात सुनावणी झाली. हवेची गुणवत्ता न सुधारल्यास दिवाळीत मुंबईतील बांधकामांवर निर्बंध लावण्याचे संकेत दिले उच्च न्यायालयाने दिले होते. त्यामुळे शुक्रवारच्या सुनावणीकडे सर्वांचं लक्ष होते.
फटाक्यांच्याबाबतीत प्रशासनाने अधिक गंभीर व्हायला हवे. बेरीयम धातूच्या वापराबाबत सर्वोच्च न्यायालयानने घालून दिलेल्या मार्गदर्शक तत्वांचे काटेकोरपणे पालन व्हायला हवे. काही राज्यांनी याबाबत क्यूआर कोड सारखे चांगले उपाय केले आहेत, मुंबईत याबाबत काय तपासणी सुरू आहे? असा प्रश्न उच्च न्यायालायने प्रशासनाला विचारला.
मुंबई उच्च न्यायालयाने दाखल केलेल्या सुमोटो याचिकेवर सुनावणी करताना शुक्रवारी महत्वाचे निर्देश दिलेत. न्यायालयाने मुंबईतील बांधकाम क्षेत्रावर तूर्तास बंदी नाही, मात्र काही निर्बंध लागू राहतील असे स्पष्ट केले. 19 नोव्हेंबरपर्यंत बांधकामातील डेब्रिज वाहून नेणाऱ्या ट्रकवर पूर्णपणे बंदी घालण्यात आली आहे. सामानाची ने आण करण्यास मात्र मुभा असणार आहे. परंतु, डेब्रिज वाहतुकीवर बंदी लागू असणार असल्याचे न्यायालयाने म्हटले. (Mumbai Pollution)
हवा गुणवत्ता निर्देशांकाबाबत समिती
हवा गुणवत्ता निर्देशांकाबाबत काम करण्याकरता एक विशेष समिती स्थापन करण्याचे निर्देश मुंबई उच्च न्यायालयाने दिले आहेत. या समितीमध्ये नीरी आणि आयआयटी मुंबईतील विषयाशी संबंधित तज्ञ आणि एक निवृत्त प्रधान सचिव नेमण्याचे निर्देश देण्यात आले आहेत. ही समिती पालिकेच्या दैनंदिन अहवालावर काम करून आपला अहवाल दर आठवड्याला तयार करेल. नंतर हा अहवाल कोर्टात सादर होणार आहे.
