BJP : मुंबई: भारतीय जनता पक्षाच्या महाराष्ट्र प्रदेशात माध्यम विभागात महत्त्वाच्या नियुक्त्या जाहीर करण्यात आल्या आहेत. प्रदेश माध्यम प्रमुखपदी गोविंद येतयेकर यांची तर सह माध्यम प्रमुखपदी ओम प्रकाश चौहान यांची नियुक्ती करण्यात आली आहे. या निर्णयामुळे पक्षाच्या माध्यम व्यवस्थेला नवे बळ मिळणार असल्याची चर्चा आहे.
भाजपचे प्रदेशाध्यक्ष रविंद्र चव्हाण यांच्या उपस्थितीत या दोघांना नियुक्तीपत्र देण्यात आले. यावेळी त्यांचा पुष्पगुच्छ देऊन सत्कार करण्यात आला आणि पुढील कामासाठी शुभेच्छा देण्यात आल्या. या कार्यक्रमाला पक्षाचे सरचिटणीस राजेश पांडे, सुनील राणी तसेच भारतीय जनता युवा मोर्चाचे अध्यक्ष कृष्णराज महाडिक यांच्यासह अनेक पदाधिकारी उपस्थित होते.
गोविंद येतयेकर हे पत्रकार म्हणून ओळखले जातात. त्यांनी सामाजिक आणि संघटनात्मक क्षेत्रातही काम केले आहे. यापूर्वी ते विविध संघटनांमध्ये सक्रिय होते. त्यांच्या अनुभवाचा फायदा पक्षाच्या माध्यम विभागाला होईल, अशी अपेक्षा व्यक्त केली जात आहे.
ओम प्रकाश चौहान हे भाजपाचे जुने आणि अनुभवी कार्यकर्ते आहेत. ते अनेक वर्षांपासून माध्यम विभागात काम करत आहेत. पक्षाच्या धोरणांची माहिती जनतेपर्यंत पोहोचवण्यात त्यांचा सक्रिय सहभाग राहिला आहे. त्यांच्या निवडीमुळे माध्यम व्यवस्थापन अधिक मजबूत होईल, असे पक्षाकडून सांगण्यात आले.
या नियुक्त्यांचे कार्यकर्त्यांकडून स्वागत करण्यात येत असून, आगामी काळात पक्षाची भूमिका आणि कामे अधिक प्रभावीपणे मांडली जातील, अशी अपेक्षा व्यक्त केली जात आहे.
