मुंबई: दहीहंडी कार्यक्रमातील नृत्य आणि कथित अश्लील हावभावांवरून नृत्यांगना गौतमी पाटील अडचणीत येण्याची शक्यता आहे. पुण्यात नृत्यांगना राधा पाटील यांच्याविरोधात गुन्हा दाखल झाल्यानंतर आता ठाण्यात गौतमी पाटील यांच्याविरोधात पोलिसांकडे तक्रार करण्यात आली आहे. ठाणे महापालिकेतील भाजप नगरसेविका मृणाल पेंडसे यांनी नौपाडा पोलिस ठाण्यात ही तक्रार दिली आहे.
मृणाल पेंडसे यांनी आपण राजकीय भूमिकेतून नव्हे, तर एक महिला म्हणून तक्रार केल्याचे सांगितले. दहीहंडीच्या कार्यक्रमात गौतमी पाटील यांनी अश्लील हावभाव, नृत्य आणि संवाद केल्याचा आरोप त्यांनी केला आहे. याप्रकरणी गौतमी पाटील तसेच संबंधित कार्यक्रमाच्या आयोजकांवर कारवाई करण्याची मागणी त्यांनी पोलिसांकडे केली आहे.
तक्रारीसोबत गौतमी पाटील यांचा दहीहंडी कार्यक्रमातील एक व्हिडीओही पोलिसांना देण्यात आला आहे. या व्हिडीओमध्ये गौतमी पाटील कार्यक्रमाला उपस्थित असलेल्या गर्दीशी संवाद साधताना दिसत आहेत. यावेळी त्यांनी प्रेक्षकांना उद्देशून काही वैयक्तिक स्वरूपाचे संवाद केल्याचा दावा तक्रारीत करण्यात आला आहे. या संवादावर आक्षेप घेत मृणाल पेंडसे यांनी पोलिसांकडे कारवाईची मागणी केली आहे.
अशा प्रकारच्या कार्यक्रमांमध्ये नृत्यांगनांकडून सादर होणाऱ्या नृत्यामुळे आणि संवादांमुळे सामाजिक वातावरणावर विपरीत परिणाम होत असल्याचा आरोपही पेंडसे यांनी केला. त्यामुळे या प्रकरणात कठोर कारवाई करण्याची मागणी त्यांनी केली आहे.
दरम्यान, पोलिसांनी मृणाल पेंडसे यांची तक्रार स्वीकारली असून गौतमी पाटील यांच्याविरोधात गुन्हा दाखल केला जाणार का, याकडे लक्ष लागले आहे. तक्रारीतील आरोप आणि व्हिडीओची पोलिसांकडून पडताळणी केली जाण्याची शक्यता आहे. या प्रकरणावर गौतमी पाटील यांची भूमिका अद्याप समोर आलेली नाही.
