मुंबई : आर आर पाटील यांनी कथित सिंचन घोटाळ्याप्रकरणी माझी खुली चौकशी व्हावी म्हणून फाईलवर सही केली, हा केसाने गळा कापण्याचा प्रकार होता’ असे धक्कादायक विधान अजित पवार यांनी केले होते. त्यानंतर राजकीय वर्तुळात चर्चांना उधाण आले आहे. आर आर यांच्या निधनानंतर जवळपास ९ वर्षांनी केल्याने राजकीय वर्तुळातील अनेकांच्या भुवया उंचावल्या आहेत. आर आर पाटील यांच्या कुटुंबियांना देखील धक्का बसल्याने त्यांचे चिरंजीव रोहित पाटील यांनी सांगितले. या सगळ्यानंतर ज्येष्ठ नेते शरद पवार आणि खासदार सुप्रिया सुळे यांनी आर आर यांच्या कुटुंबियांना संपर्क करून माफीही मागितली आहे.
तासगाव कवठेमहांकाळ विधानसभा निवडणुकीच्या निमित्ताने पक्षाचे उमेदवार संजय काका पाटील यांच्या प्रचारार्थ अजित पवार आले होते. त्यावेळी त्यांनी आर आर पाटील यांच्यावर टीका करताना अजित पवार यांना कथित सिंचन घोटाळ्याची फाईल आठवली. “आर आर यांनीच त्या फाईलवर सही केली होती. त्यांच्या राजकीय जीवनात एवढे सहकार्य करूनही त्यांनी माझा केसाने गळा कापला”, असे विधान अजित पवार यांनी केले होते. तासगावमध्ये येऊन आर आर पाटील यांच्यावर विधान केल्याने अजित पवार यांच्या मूळ हेतूविषयी अनेक प्रश्नचिन्ह निर्माण झाले आहेत.
आर आर पाटील यांचे चिरंजीव रोहित पाटील यांची विधानसभेच्या पार्श्वभूमीवर झालेल्या मुलाखतीत याच अनुषंगाने प्रश्न विचारला होता. त्यावर रोहित पाटील म्हणाले, ‘अजित पवार यांच्या विधानानंतर आबा कुटुंबियांना अतिशय वाईट वाटले. जसे आम्हाला वाईट वाटले तसे ज्येष्ठ नेते शरद पवार आणि सुप्रिया सुळे यांनाही वाईट वाटले. सुप्रिया सुळे आणि शरद पवार या दोघांनीही आम्हाला दूरध्वनीवरून संपर्क केला.’ अजितदादांच्या वक्तव्यासाठी मी माफी मागते. आर आर यांनी पक्षासाठी जे कष्ट घेतले ते एका वक्तव्याने वाया गेले असं आम्हांला वाटत, असे मला सुप्रियाताई सुळे म्हणाल्याचे रोहित पाटील यांनी सांगितले.
अजितदादांच्या वक्तव्यासाठी आर. आर आबांच्या कुटुंबियांची माफी मागून सुप्रियाताईंनी त्यांच्या मनाचा मोठेपणा दाखवून दिल्याचेही रोहित पाटील यांनी सांगितले. तसेच शरद पवार यांनीही दादांच्या विधानावर खेद व्यक्त केला आहे. आबा कुटुंबियांनी अजितदादांच्या विधानावर कोणतीही प्रतिक्रिया देऊ नये. पुढे काय करायचं ते मी बघतो… असे शरद पवार म्हणाल्याचे रोहित पाटील यांनी सांगितले.
