मुंबई: पालघरमध्ये लाचलुचपत प्रतिबंधक विभागाने मोठी कारवाई करत (Mumbai Bribe) महिला महसूल अधिकाऱ्याला लाच घेताना रंगेहात अटक केली. पेल्हार ग्रामपंचायतच्या ग्राम महसूल अधिकारी उज्वला प्रवीण पाटील यांना 45 हजार रुपये स्वीकारताना एसीबीच्या पथकाने पकडले. या कारवाईमुळे महसूल विभागात एकच खळबळ उडाली आहे. (Mumbai Crime)
मिळालेल्या माहितीनुसार, तक्रारदाराच्या बांधकामाचा पंचनामा न करण्यासाठी तसेच बिलालपाडा येथील एका जमिनीवरील माती भरणीच्या पंचनाम्यासंदर्भात उज्वला पाटील यांनी लाचेची मागणी केल्याचा आरोप आहे. यासाठी त्यांनी एकूण 1 लाख 95 हजार रुपयांची मागणी केल्याचे तपासात समोर आले आहे.
तक्रारदाराने याबाबत लाचलुचपत प्रतिबंधक विभागाकडे तक्रार दाखल केली होती. त्यानंतर एसीबीने पडताळणी करून सापळा रचला. लाचेच्या रकमेचा पहिला हप्ता म्हणून 45 हजार रुपये स्वीकारताना उज्वला प्रवीण पाटील यांना रंगेहात पकडण्यात आले.
या प्रकरणी पेल्हार पोलीस ठाण्यात भ्रष्टाचार प्रतिबंधक कायद्यांतर्गत गुन्हा दाखल करण्याची प्रक्रिया सुरू असून सध्या एसीबीकडून पुढील चौकशी सुरू आहे. या धडक कारवाईमुळे वसई-विरार परिसरातील महसूल विभाग आणि ग्रामपंचायत कार्यालयांमध्ये मोठी चर्चा रंगली आहे.
