विशाल शिंदे
राजगड: पुणे शहरातील कोंढवा खुर्द येथील काही तरुण रविवारी पानशेत परिसरात फिरण्यासाठी आले असताना दुर्दैवी घटना घडली. पानशेत धरणाच्या कालव्यात पोहण्यासाठी उतरलेल्या एका २२ वर्षीय तरुणाचा पाण्यात बुडून मृत्यू झाला. विशेष म्हणजे संपूर्ण शोधमोहीम आणि बचावकार्य आपत्ती व्यवस्थापन पथकाने राबवून तरुणाचा मृतदेह बाहेर काढला.
मिळालेल्या माहितीनुसार, अंकुश मनोज चौधरी (वय २२, रा. मलीक नगर लेन नं. १, ईशापल सोसायटी, कोंढवा खुर्द, पुणे) हा आपल्या मित्रांसह पानशेत येथे फिरण्यासाठी आला होता. दुपारी सुमारे ३ वाजण्याच्या सुमारास अंकुश, आदर्श पांडे व देव भारती हे तिघे कालव्यात पोहण्यासाठी उतरले. यावेळी अंकुश याला पाण्यात अचानक खोल खड्डा लागल्याने तो पाण्यात बुडू लागला.
त्याच्या मित्रांनी त्याला वाचविण्याचा प्रयत्न केला, मात्र कालव्यातील पाण्याचा वेग जास्त असल्याने आणि अंकुशला पोहता येत नसल्याने तो वाहून गेला. घटनेची माहिती मिळताच पानशेत पोलीस दुरक्षेत्रातील कर्मचारी, धरण सुरक्षा रक्षक तसेच आपत्ती व्यवस्थापन पथक घटनास्थळी दाखल झाले.
आपत्ती व्यवस्थापन पथकाने तात्काळ शोधमोहीम सुरू करून कालव्यात शोध घेतला. अथक प्रयत्नांनंतर अंकुश चौधरी याचा मृतदेह पाण्यातून बाहेर काढण्यात यश आले. या घटनेची नोंद वेल्हे पोलीस ठाण्यात करण्यात आली असून पुढील तपास सुरू आहे.
