पालघर : मुंबई-अहमदाबाद महामार्गावर मद्यधुंद अवस्थेत असल्याल्या टेम्पो चालकाने भरधाव वेगात दोन वाहनांना धडक दिल्याची घटना घडली आहे. पीकअप टेम्पो आणि इको कारला धडक देत टेम्पो थेट पुलाच्या नाल्यात जाऊन कोसळला आहे. या अपघातात मागच्या बाजूने धडक दिलेला पीकअप टेम्पो अनियंत्रित होऊन मुंबई मार्गकिवर जाऊन रस्ता दुभाजकात उलटला.
ही घटना शुक्रवारी (दि.१०) सकाळी अकरा वाजण्याच्या सुमारास हालोली गावच्या हद्दीत गुजरात वाहिनीवर आगरी कट्टा हॉटेल समोर घडली.
दरम्यान, या तिहेरी अपघातात कोणालाही दुखापत झाली नाही. अपघातात ग्रस्त टेम्पोचा चालक थोडक्यात बचावला आहे. मद्यधुंद अवस्थेतील टेम्पो चालकावर वाहनचालक आणि स्थानिक ग्रामस्थांनी संताप व्यक्त केला. मद्यविक्री करणाऱ्या महामार्गालगतचे ढाबे आणि हॉटेल विरोधात कारवाईची मागणी नागरिकांमधून जोर धरत आहे.
