पुणे: आज म्हणजे 7 सप्टेंबर 2025 रोजी यंदाच्या वर्षातील शेवटचे पूर्ण चंद्रग्रहण होणार आहे. एकूण 3 तास 30 मिनिटांचे हे चंद्रग्रहण रात्री घडेल. ज्योतिषशास्त्रानुसार, या ग्रहणापूर्वी सुतक काळ सुरू होणार असून, या काळात काही विशिष्ट नियमांचे पालन करणे आवश्यक आहे. विशेष म्हणजे हे ग्रहण भारतातही दिसणार असल्याने खगोलप्रेमी आणि धार्मिक दृष्टिकोनातून हा दिवस खूप महत्त्वाचा ठरणार आहे.
या चंद्रग्रहणाचा एकूण कालावधी सुमारे 3 तासांपेक्षा जास्त असणार आहे. वैदिक पंचांगानुसार, हे ग्रहण रात्री 9:57 वाजता सुरू होणार आहे. ग्रहणाची सर्वात महत्त्वाची अवस्था, म्हणजेच पूर्ण चंद्रग्रहण, रात्री 11:01 वाजता सुरू होईल आणि 12:23 वाजेपर्यंत चालेल. या टप्प्याचा कालावधी अंदाजे 1 तास 22 मिनिटे असेल, ज्यामुळे ही घटना पाहण्यासाठी पुरेसा वेळ मिळेल.
चंद्रग्रहणाचा कालावधी आणि सुतक काळ
सुतक काळाचा विचार केल्यास, ज्योतिषशास्त्रानुसार, चंद्रग्रहणापूर्वी 9 तास आधी सुतक काळ सुरू होतो. त्यामुळे 7 सप्टेंबर रोजी दुपारी 1:57 वाजता सुतक कालावधी सुरू होईल. भारतीय परंपरेत चंद्रग्रहण केवळ एक खगोलशास्त्रीय घटना मानली जात नाही, तर त्याला धार्मिक, सांस्कृतिक आणि वैज्ञानिक दृष्टीनेही महत्त्व दिले जाते. धर्मशास्त्रानुसार, ग्रहणकाळात आत्मचिंतन, मंत्रजप, ध्यान आणि दानधर्म केल्यास पुण्य प्राप्त होते. सुतक काळात भक्तांनी देवाचे मंत्रजप आणि स्मरण करणे अत्यंत फलदायी मानले जाते.
सुतक काळातील नियम आणि महत्त्व
ग्रहण संपल्यानंतर घर आणि मंदिराची स्वच्छता करून देवतांची पुन्हा पूजा केली जाते. सुतक काळात देवाच्या मूर्तींना स्पर्श करणे किंवा पूजा करणे टाळावे असे सांगितले जाते. या काळात केस आणि नखे कापणे तसेच कोणतेही शुभकार्य करणे अशुभ मानले जाते. ग्रहण सुरू झाल्यावर अन्नपदार्थ खाणे-पिणे निषिद्ध आहे. अशा वेळी, आधीच तयार केलेल्या अन्नात तुळशीची पाने किंवा दुर्वा टाकल्यास ते अन्न शुद्ध राहते. धार्मिक शास्त्रानुसार, गर्भवती महिलांनी या काळात घराबाहेर जाणे टाळावे, कारण त्याचा नकारात्मक परिणाम होऊ शकतो. एकूणच, हे चंद्रग्रहण खगोलप्रेमींसाठी एक मोठी पर्वणी असून, धार्मिक दृष्टीनेही हा दिवस आत्मपरीक्षण आणि शुद्धीकरणासाठी महत्त्वाचा मानला जातो.
