पिंपरी: चऱ्होली खुर्द येथे कारवाई करत गुन्हे पोलीस शाखा युनीट 3 पथकाने सोमवारी 12 फेब्रुवारीला एका 24 वर्षीय तरुणाला देशी बनावटीचे पिस्टल व जिवंत काडतुसासह अटक केली आहे. हरीओम गणेश पांचाळ (वय 24 रा.आळंदी) असे अटक आरोपीचे नाव आहे. याप्रकरणी पोलीस शिपाई सागर बाळासो जैनक यांनी आळंदी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, आरोपी हा त्याच्या ताब्यात शस्त्र घेऊन फिरत होता. याची माहिती पोलिसांना मिळताच पोलिसांनी सापळा रचून आरोपीला चऱ्होली खुर्द येथील गायरान येथून अटक केले. यावेळी त्याच्याकडून 1 देशी बनावटीचे पिस्टल 1 जिवंत काडतुस हस्तगत केले. यावरून आळंदी पोलिसांनी आरोपीवर गुन्हा दाखल केला असून पोलीस पुढील तपास करत आहेत.
