हडपसर : मित्राची प्रगती पाहवत नसल्याच्या रागातून झालेल्या जुन्या वादाचे पर्यवसान थेट हाणामारीत झाले. मामाच्या नवीन घराच्या बांधकामावरून शिवीगाळ करत एका तरुणाने मित्राच्या डोक्यात दगड घातल्याची धक्कादायक घटना मांजरी परिसरात घडली. या हल्ल्यात तरुण गंभीर जखमी झाला असून त्याच्यावर खासगी रुग्णालयात उपचार सुरू आहेत.
याप्रकरणी अभिजित बाळू गायकवाड (वय 21, रा. माळवाडी, मांजरी) यांनी मांजरी पोलीस ठाण्यात फिर्याद दिली आहे. त्यावरून पोलिसांनी बादल विकास नरसिंगे (वय 20, रा. माळवाडी, मांजरी) याच्याविरुद्ध गुन्हा दाखल केला आहे.
पोलिसांनी दिलेल्या माहितीनुसार, अभिजित गायकवाड हे इलेक्ट्रिशियन असून त्यांचे मामा सुनिल लोंढे यांच्या नवीन घराचे बांधकाम सुरू आहे. 20 ऑगस्ट रोजी सायंकाळी सुमारे सहा वाजण्याच्या सुमारास अभिजित हे घराजवळ मित्रांसोबत गप्पा मारत बसले होते. त्यावेळी त्यांचा तोंडओळखीचा मित्र बादल नरसिंगे तेथे आला आणि त्यांच्यासोबत गप्पा मारू लागला.
मामाच्या नवीन घराच्या बांधकामावरून बादलच्या मनात राग असल्याने त्यांची प्रगती त्याला पाहवत नसल्याने तो नवीन घराचे बांधकामावरुन वारंवार त्यांच्यासोबत भांडण करीत असे. या जुन्या वादातून त्याने फिर्यादी यांना शिवीगाळ करण्यास सुरुवात केली. फिर्यादी यांनी त्यास शिवीगाळ का करतो, असे विचारले असता त्याने जवळच पडलेला दगड उचलून फिर्यादीच्या डोक्यात घातला.
त्यांच्या डोक्यातून रक्तस्त्राव सुरु झाला. फिर्यादी व मित्रांचा आरडाओरडा ऐकून त्यांची आजी नंदबाई लोंढे तेथे आल्या. त्यांनी अभिजित यांना जवळच्या हॉस्पिटलमध्ये दाखल केले. त्यांच्यावर सध्या उपचार सुरू आहेत. या घटनेप्रकरणी मांजरी पोलिसांनी बादल नरसिंगे याच्याविरुद्ध गुन्हा दाखल केला असून पोलीस उपनिरीक्षक हनुमंत तरटे तपास करीत आहेत.
