पुणे: एकीकडे शहरात विविध सामाजिक आणि राजकीय संघटनांकडून आंदोलने सुरू असतानाच, दुसरीकडे महिलांच्या सुरक्षेचा प्रश्न पुन्हा ऐरणीवर आला आहे. सामाजिक चळवळीत सक्रीय असलेल्या एका महिलेला व्हॉट्सॲप स्टेटसवरून अश्लील मेसेज पाठवून विनयभंग केल्याचा प्रकार समोर आला असून, याप्रकरणी विश्रामबाग पोलिस ठाण्यात गुन्हा दाखल करण्यात आला आहे.
ही महिला नुकत्याच पार पडलेल्या एका आंदोलनात सक्रीय सहभागी होती. आंदोलनानंतर तिने आपल्या व्हॉट्सॲप स्टेटसवर आंदोलनाचे फोटो आणि संबंधित विचार शेअर केले होते. मात्र, याच स्टेटसवरून समीर वाव्हळे (पूर्ण नाव अस्पष्ट) या तिच्या संघटनेतील जुन्या सहकाऱ्याने तिच्यावर अश्लील आणि अवमानकारक भाषेत मेसेज करून तिचा मानसिक छळ केला, असा आरोप आहे.
पोलिसांनी दिलेल्या माहितीनुसार, आरोपीने पीडित महिलेला अनेक आक्षेपार्ह आणि अश्लील मेसेज पाठवले आहेत. “तुझं आंदोलन सक्सेसफुल झालं का?”,“आंदोलन करून काय फायदा होतो?”,“छान छान कपडे घालून आंदोलन होतं का?”, “तू किती गोरी चिकनी दिसतेस!”, “आंदोलनात ज्या साडीमध्ये आली होतीस, तीच साडी घालून या मर्द गड्याला भेट.” या सर्व मेसेंगमुळे पीडित महिला त्रस्त झाली, महिलेला लज्जा वाटली आणि तिने थेट पोलिसांकडे धाव घेतली.
या प्रकरणी IPC कलम 354(A) – लैंगिक छळ तसेच माहिती तंत्रज्ञान कायदा (IT Act) अंतर्गत गुन्हा नोंदवण्यात आला आहे. आरोपीने मोबाईल फोनद्वारे अश्लील संवाद साधल्याने तो विनयभंगाचा गंभीर प्रकार ठरतो. पोलिसांकडून आरोपीविरोधात पुढील तपास सुरू आहे. या घटनेमुळे महिलांच्या सुरक्षिततेच्या मुद्द्यावर पुन्हा एकदा प्रश्नचिन्ह उभे राहिले आहे. विशेषतः सामाजिक आणि राजकीय चळवळीत सक्रीय असणाऱ्या महिलांना अजूनही अशा मानसिक छळाचा सामना करावा लागतो, ही बाब अत्यंत खेदजनक असल्याचे मत महिलांच्या हक्कासाठी लढणाऱ्या संघटनांनी व्यक्त केले आहे. सामाजिक चळवळींचा अपमान करणाऱ्या आणि महिलांच्या सहभागावरच प्रश्न उपस्थित करणाऱ्या अशा विकृत मानसिकतेच्या व्यक्तींना कठोर शिक्षा व्हावी, अशी जोरदार मागणी संबंधित संघटनेकडून करण्यात येत आहे.
