जळगाव : गेल्या काही दिवसांपासून राज्यातील गुन्हेगारींच्या घटनात दिवसेंदिवस वाढ होत चालली आहे.अशातच आता जळगावच्या धरणगाव तालुक्यातील सोनवद गावाजवळील विहीर फाटा परिसरात धक्कादायक घटना उघडकीस आली आहे. एका तरुणाने आपल्या वडिलांच्या खुनाचा राग मनात धरून एका व्यक्तीची गोळी घालून हत्या केली आहे.या घटनेने परिसरात खळबळ उडाली आहे.
याबाबत मिळालेल्या माहितीनुसार, राहुल सावंत या 26 वर्षीय तरुणाच्या वडिलांचा 2010 मध्ये गावातील वादातून खून झाला होता या प्रकरणात गोपाल मालचे हा आरोपी होता. गेल्या काही दिवसापासून वडिलांच्या खुनाचा बदला घेण्याची आग त्याच्या मनात धगधगत होती. मंगळवारी रात्री साधारण आठच्या सुमारास गोपाल मालचे कुटुंबीयांसोबत घरी परत येत असताना राहुलने विहीर फाटा येथे त्यांच्या कारसमोर आपली बुलेट लावली. रस्त्यावर बुलेट लावलेली पाहून गोपाल मालचे हे कारमधून खाली उतरले. यावेळी राहुलने गोपालच्या कपाळाच्या मधोमध नेम धरत गोळी झाडली. यात गोपाल मालचेचा जागीच मृत्यू झाला.
दरम्यान हत्या केल्यानंतर आरोपी घटनास्थळावरून पळाला नाही. तर त्याने थेट धरणगाव पोलीस स्टेशन गाठत स्वत:ला पोलिसांकडे सरेंडर केलं आहे. या प्रकरणी पोलिसांनी आरोपी मुलाला अटक केली.दरम्यान गावात तणावाचे वातावरण असल्यामुळे पोलिसांनी तगडा बंदोबस्त लावला आहे
