पुणे : सर्वोच्च न्यायालयात शिवसेना पक्ष आणि धनुष्यबाण या चिन्हासंदर्भात सुरू असलेली सुनावणी आज अचानक पुढे ढकलण्यात आली आहे. या प्रकरणात 17 सप्टेंबर रोजी न्यायालयात शेवटचा युक्तिवाद झाला होता, ज्यानंतर न्यायालयाने 22 सप्टेंबर ही पुढील तारीख निश्चित केली होती. मात्र आता या सुनावणीला पुन्हा ब्रेक लागला असून पुढील सुनावणीकडे सर्वांचे लक्ष लागून राहिले आहे

आजच्या वेळापत्रकानुसार उपमुख्यमंत्री एकनाथ शिंदे यांच्या बाजूने वरिष्ठ वकील नीरज किशन कौल आपले मांडणी सादर करणार होते. मात्र, आज ही प्रस्तावित सुनावणी होऊ शकली नाही. सुप्रीम कोर्टाच्या या घडामोडीनंतर शिंदे गटाचे प्रवक्ते राजू वाघमारे यांनी न्यायालयाच्या आवारात पत्रकारांशी संवाद साधला. विरोधी पक्षाचे सर्व युक्तिवाद आम्ही आत्तापर्यंतच्या प्रक्रियेत पूर्णपणे खोडून काढले आहेत, असा दावा त्यांनी केला.
राजू वाघमारे यांनी स्पष्ट केले की, निवडणूक आयोग ही एक स्वायत्त संस्था असून त्यांना कायदेशीर निर्णय घेण्याचे पूर्ण अधिकार आहेत. नियमांनुसार योग्य त्या सर्व मार्गांचा वापर करूनच आयोगाने शिंदे गटाला अधिकृत पक्ष आणि चिन्ह बहाल केले आहे. नीरज कौल यांनी मागील सुनावणीदरम्यान न्यायालयासमोर या कायद्याची आणि निवडणूक आयोगाच्या अधिकारांची योग्य ती मांडणी केली होती.

विरोधकांच्या आरोपांना उत्तर देताना वाघमारे म्हणाले की, “आमदारांच्या अपात्रतेचा निकाल लागेपर्यंत निवडणूक आयोगाने वाट पाहायला हवी होती, असा कोणताही कडक नियम किंवा कायदा अस्तित्वात नाही. त्यामुळे विरोधकांचा हा दावा पूर्णपणे चुकीचा ठरतो. विरोधी गट आता सोशल मीडियावरील इन्फ्लुएन्सर्सचा आधार घेऊन जनतेत खोटा प्रचार आणि चुकीचा नरेटिव्ह पसरवण्याचा प्रयत्न करत आहे.

मात्र, जनता आता सतर्क झाली असून सत्य काय आहे हे सर्वांना समजले आहे.”असत्य हे फक्त काही काळापुरतेच टिकू शकते, मात्र कायदा नेहमी सत्याच्या पाठीशी उभा राहतो. त्यामुळे सर्वोच्च न्यायालयाच्या अंतिम निर्णयावर आमचा पूर्ण विश्वास आहे, असा ठाम विश्वास त्यांनी शेवटी व्यक्त केला.







