पुणे : शिक्षण क्षेत्रात खळबळबळ उडवून देणाऱ्या बहुचर्चित ‘शालार्थ आयडी’ घोटाळ्याला आता एक वेगळे वळण मिळाले आहे. नाशिक पोलिसांनी या प्रकरणाचा मुख्य सूत्रधार (मास्टरमाइंड) प्रशांत वाडीले याला धुळे येथून बेड्या ठोकल्या आहेत. धक्कादायक बाब म्हणजे, वाडीले हा केंद्रीय राज्यमंत्री रामदास आठवले यांच्या ‘रिपब्लिकन पार्टी ऑफ इंडिया’ या पक्षाच्या शिक्षक आघाडीचा धुळे जिल्हाप्रमुख आहे. त्यामुळे या संपूर्ण गैरव्यवहाराचे थेट राजकीय कनेक्शन आता समोर आले आहे.
नाशिक रोड पोलीस ठाण्यात नोंद असलेल्या या गुन्ह्याचा तपास करण्यासाठी पोलीस आयुक्त संदीप कर्णिक यांनी उपायुक्त संदीप मिटके यांच्या मार्गदर्शनाखाली एक विशेष तपास पथक नेमले होते. या पथकाने शनिवारी पहाटे 4 च्या सुमारास धुळ्यातून वाडीलेला ताब्यात घेतले. या घोटाळ्यात अटक करण्यात आलेला तो चौथा आरोपी आहे.
तपासातून समोर आलेल्या माहितीनुसार, प्रशांत वाडीले याने बनावट कागदपत्रांच्या आधारे तब्बल 54 शिक्षण संस्था आणि 65 आश्रम शाळांचे जाळे कागदोपत्री उभे केले होते. साक्री आणि शिंदखेडा येथे त्याच्या काही विनाअनुदानित शाळा असल्या तरी, प्रत्यक्षात अस्तित्वात नसलेल्या अनेक शाळा दाखवून त्याने मोठा खेळ रचला.
तसेच शिक्षण विभागाची अधिकृत वेबसाईट हॅक करून जुन्या आदेशांचा गैरवापर करण्यात आला. शेकडो शिक्षकांना बनावट नियुक्तीपत्रे देऊन कोट्यवधींचे अनुदान लाटण्यात आले. या संपूर्ण कारस्थानातून राज्य शासनाचे सुमारे 160 कोटी रुपयांचे अनुदान हडप करण्यात आल्याचा संशय आहे.
पोलिसांनी या प्रकरणाचा सखोल तपास केला असून, यापूर्वीच न्यायालयात 11,000 पानांचे दोषारोपपत्र (चार्जशीट) दाखल केले आहे. वाडीलेच्या अटकेमुळे शिक्षण विभागातील आणखी काही मोठे मासे आणि शासकीय अधिकारी पोलिसांच्या रडारवर येण्याची शक्यता वर्तवली जात आहे.
