पुणे : खडकवासला धरणसाखळी प्रकल्पातील चारही धरणांच्या पाणलोट क्षेत्रात मुसळधार पाऊस सुरू असल्याने शुक्रवारी दुपारी १ वाजता खडकवासला धरणातून ३० हजार ६७७ क्यूसेक पाणी मुठा नदीत सोडण्यात आले असल्याची माहिती खडकवासला, पानशेत व वरसगाव प्रकल्पाचे सहाय्यक अभियंता योगेश भंडलकर यांनी दिली.
नदीकाठच्या भागात पूरस्थिती उद्भवण्याची शक्यता असून नागरिकांनी आपले वाहने तसेच इतर साहित्य काढून घ्यावे असे आवाहन पाटबंधारे विभागाकडून करण्यात आले आहे. पुणे शहराला पाणीपुरवठा करणाऱ्या खडकवासला धरणसाखळी प्रकल्पात सुरू असलेला मुसळधार पाऊस गुरुवारी सकाळपर्यंत कायम होता. त्यामुळे पानशेत धरण १०० टक्के भरले असून या धरणातून खडकवासला धरणात पाण्याचा विसर्ग सुरू करण्यात आला आहे.
दरम्यान, पावसाच्या प्रमाणानुसार व येव्यानूसार विसर्ग कमी किंवा जास्त करण्याची शक्यता आहे. नदीकाठच्या नागरिकांनी दक्षता घ्यावी असे आवाहन खडकवासला, पानशेत व वरसगाव प्रकल्प सहाय्यक अभियंता योगेश भंडलकर यांनी केले आहे.
